Corte di Prome Instancia na Corsou awe, diahuebs, a duna su veredicto den un caso sumario contra pais Corsou. Un caso cu a wordo cuminsa door di diez persona (cuatro hende muhe y seis hende homber).
Ta trata di personanan di nacionalidad Venezolano sin un permiso di estadia valido. E intencion tras di e caso sumario tabata pa anula nan detencion.
E cuatro hende muhenan ya caba a wordo laga liber prome cu e caso sumario, pa cual motibo Hues a dicidi solamente riba peticion di e otro demandantenan. E grupo aki ta deteni den e compleho di detencion di SDKK. A base di articulo 5 di Tratado Europeo pa Derechonan Humano e luga y circunstancianan di e detenidonan mester ta adecuado, y mester ta diferente cu esnan deteni pa casonan penal.
Corte a husga cu Blok 1 di SDKK en principio ta cumpli cu e condicionnan pa detencion di stranheronan. Pero e regimen cu pais ta impone riba e demandantenan , ta mas estricto cu e regimen pa detenidonan den casonan penal.
E demandantenan mester pasa 18 ora pa dia den nan cel. E celnan ta calor y scur. Luz ta cende solamente di 7’or pa 9’or di anochi. Solamente seis ora pa dia nan mag Sali di nan cel. Durante e oranan ey tampoco nan tin bista di e mundo pafo, tin poco posibilidadnan di recreacion, y no tin nada pa pasa nan dia.
Esaki ta diferente cu detenidonan den casonan penal. Nan ta dispone di por ehempel un area pa haci deporte, tin biblioteca, y luga pa traha. Y door di esey tin contacto cu mundo pafo tambe.
Corte ta haya e regimen cu pone riba e demandantenan, sigur mirando cu nan ta den e situacion aki desde 31 di mei 2022, inaceptabel. Pais ta actua di un forma ilegal. Pa e motibo aki Corte a ordena pa laga nan den libertad. Pa dos di e seis personanan aki, e opheffing di nan detencion ta conta solamente si nan vuelo di repatriacion pa Venezuela no sigui manera planea dia 17 di juli awo.