ORANJESTAD, Aruba
Den un sala basta yena cu miembronan di prensa, Departamento di Salud Publico a tene un conferencia di prensa pa trece e ultimo desaroyonan rond di e virus COVID-19. Departamento di Salud Publico ta tumando nota di hopi articulonan cu ta sali riba medionan di comunicacion sociaal cu tin biaha e contenido no ta cuadra totalmente. P’esey ta importante pa tuma nota di informacion cu ta sali for di instancianan di salud oficial.
E virus di COVID-19 enberdad ta plamando pa diferente region rond mundo y World Health Organizacion recientemente a manda un alerta global unda ta pronostica cu e virus lo bira un pandemia. Un pandemia cu lo afecta entre 40% pa 70% di mundo. Esaki ta nifica cu Aruba no lo ta un exepcion. Nos tambe lo bay encontra e virus aki y e pregunta ta con prepara nos instancianan ta y tambe si comunidad ta prepara.
Como Departamento di Salud Publico nos ta trahando dia aden y dia afo riba monitor di nos puertonan. Nos tin contacto estrecho cu Aruba Porta Authority (APA) y Imigracion di Aruba pa vigila tur biahero cu ta yega Aruba. Nos tin contacto cu asosacion di dokternan di cas, hospital y ambulance pa den caso cu e prome pashent presenta . Tur e colaboracion local y internacional cu RIVM, CDC, WHO, PAHO y Carpha ta di gran importancia y gran sosten pa nos. Departamento di Salud Publico su profecionalnan tin amplio experiencia di casonan den pasado y ta consentra riba gara e prome caso na momento cu e yega. Lo mas importante ta pa contene esaki y evita cu eta sigui plama rond di nos isla.
Segun definicion internacional un persona por tin COVID-19 of por wordo considera sospechoso si:
- E persona tin keintua di por lo menos 38 grado celcius y tin por lo menos un of mas di e siguente sintomanan respiratorio entre otro tosamento of rosea cortico y e kehonan aki a cuminsa dentro di 14 dia despues cu e biahero a regresa for di un area afecta pa e virus COVID-19.
Na e momentonan aki expertonan y organisacionan internacional ta studiando e virus aki su caracteristicanan pa por ofrese un forma di proteccion contra dje. Te na e momento aki expertonan por a conclui cu e virus ta pasa di hende pa hende atravez di particulanan cu ta keda den aire of riba superficie na momento cu un hende malo cu sintomanan respiratorio manera griep tosa of nister. P’esey expertonan y DVG ta recomenda como medida di prevencion :
- Evita contacto directo cu persona nan cu tin un infeccion respiratorio
- Laba man frecuentemente cu awa y habon of uza “hand sanitizer” prinsipalmente prome cu come y evita di mishi cu bo wowo, nanishi y boca mirando cu esaki ta e ruta cu e virus ta uza pa drenta bo curpa y sigui reproduci su mes.
- Tambe ta haci un suplica na esnan cu ta malo cu sintomanan respiratorio manera griep. Pa evita bay den publico, keda cas y proteha otronan. Esnan cu sintoma nan respiratorio, practica etiketa di tosa (tosa of niester den elleboog of den un nepkins; laba man despues)
- Si bo persona a regresa di un area afecta y den 14 dia of menos desaroya sintoma nan respiratorio, tuma contacto preferiblemente via telefon cu bo dokter di cas y comparti bo historia di biahe.
Informacion ricibi for di WHO ta indica cu tur hende di tur edad por haya e infeccion aki pero esnan mas vulnerable pa haya complicacion ta persona nan di edad halto cu un condicion medico existente (esnan diabetico, ta sufri di cancer of cu un malesa di curazon) por compara e virus aki cu virus di influenza pero influenza su grado di mortalidad ta mas halto cu COVID-19.
Si tin cualkier pregunta encuanto e COVID-19, por fabor tuma contacto cu Servicio di Malesanan Infeccioso na number di telefoon 5224224/5224236/5224237/5224261/5224264 of na Departamento di Epidemiologia y Investigacion 5224285.
