Curaçao ta bay bira interport pa biahenan crucero den region di Caribe. Esaki danki na un
colaboracion entre e empresa Británico Ambassador Cruise Line y Corendon. Esaki a keda anuncia
awe 9 januari 2025 na Corsou dor Atilay Uslu, CEO di Corendon.
Na tur lo tin 10 cruise durante e temporada halto di 2025/2026. E cruises den colaboracion cu
Corendon ta cuminsa den high-season crucero di november 2025, cu embarkashonan riba diaranson
diasabra for di haf di Willemstad pa islanan manera entre otro Guadeloupe, Barbados, St. Kitts, St.
Lucia, St. Maarten, Aruba y Boneiru.
E prome biahe for di Corsou ta Sali 19 di november 2025. E ultimo ta programa pa 21 di februari 2026. Pa e cruise ta bay uza e barco Cruzero Renaissance di e empresa Británico Ambassador Cruise Line cu hunto cu Corendon ta bay organisa biahenan Cruzero den Caribe. Renaissance no ta desconoci pa Curaçao y region di Caribe. Antes lo a sirbi como e Maasdam di Holland America Line (HAL).
Corsou ta bira un haf pa Renaissance na unda pasaheronan di Corsou, Estados Unidos, Sur Amerika, y regional di Aruba, Bonaire y Sürnam por subi e barco. Corendon ta bay enfoca pa su cruisenan tambe riba bishitantenan di Hulanda y otro pais manera Belgica y Inglatera, cu via Corendon por subi e barco na Corsou. Pasahero ta subi abordo pa un bishita di 10 te 11 anochi. Nan por scoge tambe pa keda mas largo na Corsou pa un estadia den un hotel di tres, cuater of cinco strea.
Corendon a anuncia cu un biahe den un cabina interior pa 10 of 11 anochi (11 of 12 dia). Un biahe ta
cuminsa na 999 Euro. Biaheronan por scoge den diferente clase, manera un cabina interno, un
cabina cu bista riba lama, un camber cu balcon of cu un terasa. E prijsnan ta cambia depende di e
tipo di camber.
E duracion di e biahe ta bay depende di e ruta. Por scoge diferente ruta riba diferente fecha, asina Uslu a anuncia durante un conferencia di prensa den The Rif Resort Curaçao.
Renaissance ta un barco crucero di e klase Statendam ku 629 cabina. Den luna di october 2022 e
barco a keda completamente renoba y revisa pa Damen Shipyards den e haf Francés Brest. E barco ta perfectamente mantene y ta ofrece un servicio di lata calidad a bordo.
Biahenan di cruise ta hopi popular den e region di Caribe. Corsou ta ser considera pa expertonan
como un punto ideal pa embarca riba un cruise den Caribe. Pasaheronan riba Renaissance por gosa
di destinacion idilico cu un alto grado di cultura y historia. E region di Caribe ta ofrece un gran
variedad di actividad, mientras esunnan cu gusta trankilidad por gosa di e ambiente riba e barco
crucero.