Parlamento di Sint Maarten a organisa un reunion di Presidium Contactplan cu coleganan parlamentario di e paisnan Aruba, Curaçao y Suriname.
E reunion aki a keda programa pa dialuna 23 di october 2023, pero no por a tuma luga pa motibo di retraso den conexion di vuelo como resultado di horcan Tammy.
E reunion di Presidium tabata consisti di e Presidente di Parlamento di Aruba, Sr. Edgard Vrolijk, Presidente di Parlamento di Curaçao, Sra. Charetti America-Francisca, Presidente di Parlamento di Sint Maarten, Sr. Sidharth Bijlani, Presidente di Asamblea Nacional di Suriname, Sr. Marinus Bee, y e presidentenan of miembronan nombra di e comisionnan di Asuntonan di Reino (y/of Relacionnan Internacional) di e parlamentonan di e paisnan.
Durante e encuentro aki e delegacionnan a yega na un acuerdo cu ainda tin interes mutuo pa colaboracion entre e cuater paisnan y e paisnan di Caribe.
Aruba, Curaçao, Sint Maarten, y Suriname.
E delegacionnan tambe a yega na un acuerdo cu nan lo establece un grupo di trabou cu lo tin e tarea di prepara e puntonan di agenda pa e siguiente Plan di Contacto Parlamentario cu ta bay tuma luga na februari 2024 na Aruba. E preparacionnan aki lo cuminsa na november 2023. E topiconan cu lo ser discuti lo trata asuntonan cu ta beneficioso pa e parlamentonan como institucion y tambe pa e paisnan en general.
Pa motibo di COVID-19 y otro eventonan, no a tene un siguimento di e ultimo reunion di Contactplan cu a tuma luga na februari 2019 na Suriname. E temanan cu a discuti y a yega na un acuerdo di cooperacion durante e reunion di e plan di contacto anterior tabata temanan di comercio, ecoturismo y agricultura.
