E problematica di hobenan cu ta keda sinta ta bon conoci, pero ultimo tempo nos por a bin ta constata un desaroyo alarmante bou di hobennan. Un desaroyo cu ta exigi atencion di inmediato y esey ta un aumento di hobennan cu no ta bay scol mas. Personalmente e experencia aki ta cay masha pisa pa ami, pasobra mi a dedica mi bida na educa hobennan como tambe na atende cu e necesidad di mi prohimo. Un principio di bida cu mi a siña di mi kerida Mama Hellen Mohamed ta pa nunca nenga di duna un man nan esnan den necesidad. P’esey pa ami como un assistente tecnico trahando na un scol secundario, ta tristo pa wak hobennan kita for di scol sin cu por a evita cu nan ta termina nan estudio. No tur ora e ta posibel pa evita cu nan ta stop, pero den combersacion cu diferente hoben mi a bin compronde e motibonan mas importante pakico nan mester a tuma e paso dramatico. Na prome lugar e hoben a hay’e ta stop pa bay traha y asina aporta na cas financieramente. Un otro motibo ta pasobra e hoben no a cumpli cu e rekisitonan pa por continua su estudio y por ultimo e hoben no ta haya e scol mas interesante.
Nos ta wordo confronta ultimamente cu cantidad di caso di hobennan cu a cai den mal caminda. Nos di UPP ta wordo frecuentemente informa door di nos lider sra. Seraida Pemberton-Leonard, directora di reclassering, encuanto un aumento di hobennan cu ta cay cera y enbes di haya un oportunidad pa rehabilita ta end up como recidivista. UPP ta di opinion cu no ta momento pa punta dede. Alcontrario ta momento pa esnan responsabel bin hunto y evalua con pa duna e hoben un man. Permitimi duna algun sugerencia.
Na prome lugar e scol lo por puntra ayudo di schoolmaatschappelijk werkers (SMW’ers) pa atende cu e problema di e hoben. Tin SMW’ers, pero no suficiente pa dedica atencion debido na e hoben cu problema. Loke tambe mi a bin ta constata ta cu e aansluiting pa cu cierto scolnan te dia di awe NO ta regla, aunke nos a bin cu sugerencianan kico pa haci pa asina yuda e hoben pa e por sikiera termina su estudio riba nivel di MBO. Actualmente nos tin MBO nivel 4 y a bin ta ripara cu e idioma Hulandes ta un obstaculo pa esnan di EPB cu kier sigui den e ramo di tecnica. A vocifera cu lo ta bon pa cuminsa projecto piloto riba nivel 3 y te hasta 2 pa asina yuda e hoben, pero no a haci nada.
Enseñansa na Aruba ta kedando atras compara cu e desaroyo mundial. No ta laat pa introduci cambionan pa yuda alcansa un nivel di calidad acceptabel den enseñansa na Aruba. Cu un bon guia, nos por preveni mas hoben kita for di scol. Un otro condicion lo ta pa e hoben wordo informa debidamente tocante nan posibilidadnan. Esaki lo engrandece nan interes pa sigui studia. E ta por ehempel mi experencia cu hopi hoben ta menos interesa pa traha den industria hotelero y lo prefera di sigui den tecnica. Mi ta Pro pa bin cu mas estudio y sigur riba nivel di MBO 2 y 3 pa asina nos hobennan no mester termina riba caya unda cu mayoria biaha nan ta termina den e rumbo NO correcto. Mayornan SIGUR ta hunga un rol sumamente importante door di sinta y motiva e hoben pa e sigui studia. Awor no ta tempo pa promesas pero sigur tempo si pa sostene y traha pa nos hobennan cu un plan concreto.