Diabierna mainta, den Conferencia di Prensa di Gobierno di Aruba, Prome Minister Evelyn Wever-Croes a anuncia decision di Conseho di Minister di Reino pa aproba peticion di Gobierno di Aruba pa kita e recorte di salario di empleadonan publico y semi publico. Ya durante comienso di e aña anterior, Gobierno di Aruba a haci e peticion aki y te awo, a haya e decision final.
Pa pone tur cos den contexto pa asina duna claridad y comprension con importante e decision di Conseho di Minister di Reino ta, Prome Minister a referi na e comienso na unda cu e pandemia a bati na nos porta na maart di 2020. Na e comienso, mercado financiero internacional a cuminsa cera porta pa Aruba, e unico alternativa cu Aruba tawata tin ta pa bati na porta di Hulanda y presta placa pa nos por sigui den e pais aki y yuda esnan cu a haya nan mes den problema door di e pandemia.
Aruba mester a cera frontera. Entradanan a baha cu 244 miyon florin. Mester a yuda esnan mas vulnerabel na Aruba. Sector priva a haya yudansa pa asina nos companianan no kibra y mester a maneha e pandemia mundial y esaki a sosode tambe na gran forma.
Aruba mester a presta 916 miyon florin for di Hulanda. Hulanda di su banda a pone condicionnan, algun chikito, algun grandi y algun hopi draconico. Un di e condicionnan ta e recorte di 12.6% riba salario di empleadonan publico y semi publico y 25% di salario di minister y parlamentarionan. E fecha cu esaki a cuminsa ta 1 di mei 2020 y desde e dia ey, ta cumpli cu e condicion aki.
Fin di juli 2022, Gobierno a tuma e decision pa cuminsa paga 5% bek di e 12.6% y a keda 7.6%. Gobierno no a para keto riba e tema aki pero a keda insisti pa e 7.6% tambe wordo elimina. Y diabierna den Conseho di Minister di Reino a aproba pa elimina e 7.6% tambe. Cu esaki tambe, e aña aki tur cos pa loke ta trata salario di empleadonan publico y semi publico ta bay bek na normalidad.
Den anticipacion di esaki, Gobierno ya caba a prepara e cuadro legal pa asina e haya su forsa retroactivo te cu 1 di januari 2023 y pa 2023 completo. Tambe, Gobierno a percura pa e placa aki ta den presupuesto di pais Aruba pa paga e suma completo tanto di e vakantie uitkering como tambe e primanan di e empleadonan publico y semi publico.
“Tur esaki y e gastonan di personal ta presupuesta y cu esaki, lo no surpasa e normanan financiero cu nos a palabra cu Hulanda. Nos ta kedando den e palabracionnan haci cu Hulanda apesar cu nos ta bay paga e 7.6%. Ami y mi coleganan di Gabinete Wever-Croes ta sumamente contento, satisfecho y alivia cu nos ta logra cera e capitulo hopi dificil aki cu a tuma hopi tempo, esfuerso y negosacion”, Prome Minister Evelyn Wever-Croes a enfatisa.
Prome Minister na final di conferencia di prensa a gradici tur empleado sector publico y semi publico, Parlamentario y Ministernan cu a mustra solidaridad cu e resto di comunidad di Aruba na momento cu cosnan tawata hopi dificil den nos pais.