Conmemoracion Nacional di e Abolicion di Slavitud 2023: Rey Willem Alexander a pidi pordon; Minister Thijsen a pone krans den nomber di Aruba

Na Oosterpark Amsterdam a tuma lugar awe 1 di juli e conmemoracion nacional di e Abolicion di Slavitud dor di Hulanda na 1863 den e colonianan Surnam y Antianan Hulandes. E aña aki e conmemoracion tabata special cu presencia di Rey Willem Alexander y Reina Maxima, Prome Minister di Hulanda Mark Rutte y varios otro ministernan di Gabinete Rutte IV. Special tamba tabata e hecho cu Rey Willem Alexander a tene un discurso, uno cu henter Reino Hulandes y Surnam tabata ancioso pa tende kico e Rey lo bisa riba e historia colonial Hulandes y e rol di sclavitud den esaki.  Loke pa basta tempo tabata tin speculacion, ta si e Rey ta bai pidi despensa pa e historia di sclavitud. Den un discurso hopi inpresionante Rey Willem Alexander no unicamente a pidi despensa, pero tambe a pidi pordon pa su antepasadonan cu no a lucha contra di e sistema di sclavitud. E despensa di Rey Willem Alexander pa e rol di Hulanda den sclavitud ta den liñea di e despensa cu Prome Minister Mark Rutte na December aña pasa a haci den nomber di Gobierno di Hulanda. Prome cu Rutte, burgemeester Femke Halsema di Amsterdam, burgemeester Ahmed Aboutaleb di Rotterdam y presidente di Banco Central di Hulanda Klaas Knot tambe a pidi despensa pa e rol di Amsterdam, Rotterdam y Banco Central den e sistema di sclavitud. 

Presidente di NiNsee Linda Nooitmeer tambe a tene un discurso. NiNsee ta e instituto cu ta organisa e conmemoracion. E parti musical di programa a conta cu canto di Izaline Calister y Black Harmony. Despues di 1 minuut di silencio e programa a sigi cu e ceremonia di pone krans na e “Slavernijmonument”.

Rey Willem Alexander y Reina Maxima a pone e prome krans. Den nomber di Gobierno di Aruba Minister Plenipotenciario mr. Ady Thijsen a pone un krans. Banda di Minister Thijsen, tambe a pone un krans entre otro presidente di Eerste Kamer Jan Anthonie Bruijn y presidente di Tweede Kamer Vera Bergkamp, Prome Minister di Hulanda Mark Rutte y Minister pa Rechtsbescherming Franc Weerwind, Minister Plenipotenciario di Curaçao Carlson Manuel, Minister Plenipotenciario di St. Maarten Rene Violenus, embahador di Surnam Rajendre Khargi y burgemeester di Amsterdam Femke Halsema.

E aña aki ta 21 aña cu NiNsee a keda funda y cu e conmemoracion nacional a inicia cu desvelo na 2002 di e “Slavernijmonument” cu ta un obra di e escultor Erwin de Vries.