ORANJESTAD,Aruba
Tur aña riba 4 di mei Reino Hulandes ta conmemora esunnan cu a fayece durante segunda guera mundial.
Tambe ta conmemora miembronan di Reino Hulandes cu a fayece durante conflictonan militar (Indonesia) y tambe durante operacionnan di pas (Libanon, Bosnia y Afghanistan).
Na e momentonan aki hopi persona den casi tur pais ta pasando den dianan dificil. Hopi persona ta sintiendo falta di nan sernan keri. Hopi ta bibando den miedo y inseguridad. Hopi ta den tristesa y ta den rouw. Tur esaki ta ser ocasiona pa e coronacrisis.
Teniendo na cuenta cu e situacion actual, e aña aki lo conmemora e victimanan di guera, teniendo cuenta cu e medidanan pa controla e coronvirus. E conmemoracion lo tuma lugar den un forma adapta, pero sin publico.
E programa lo tuma lugar na e monumento situa na Adriaan Lacle Boulevard, cu lo ta sera pa trafico y lo tuma lugar di 5 ‘or te cuarto pasa di 6 di atardi.
Gobernador di Aruba lo pone un krans.
Publico en general, familiares di civilnan y militarnan, excombatantenan y hubentud ta ser pidi pa no ta presente na e ceremonia aki.
Tambe ta pidi henter e pueblo di Aruba pa hisa bandera halfstok for di 8’or di mainta te ora solo baha na memoria di e victimanan di guera y como homenahe na e personanan cu a libera nos Reino 75 aña pasa.
