San Nicolas* – Nos di ‘Iglesia Bida Abundante’ ta organisando un ‘Congreso Familiar’ titula “¿Cómo recuperar a mi Familia?”.
Esaki lo tuma luga na e cede di nos iglesia na Clavelstraat # 21, San Nicolas, net patras di e edificio di SVB.
E congreso lo ta riba diabierna y diasabra 13 & 14 di september venidero y registracion lo cuminsa pa 06.30 pm.
E ‘keynote speaker’ di e congreso lo ta Sr. Sixto Porras for di Denver, USA. Sixto Porras a traha pa mas cu 25 aña liderando iniciativanan pa famia como vicepresidente di ‘Focus on the Family’. Sixto Porras a produci diferente programa radial y televisivo cu ta wordo difundi den mas cu 38 pais. E ta wordo consulta pa trata temanan di famia pa noticieronan, corant- y revistanan internacional y e la publica mas di 10 buki relaciona cu e tema di famia. Sixto Porras a duna conferencianan relaciona cu temanan di famia den tur e pais di Iberoamerica, Australia, Londres, Belgica y Francia. Sixto Porras ta wordo invita door di mayoria di e gobiernonan di Latino America pa trata tema nan di famia y desaroyo social.
Nos ta sumamente contento di por tin un persona di e caliber di Sixto Porras na Aruba. Durante e congreso tambe nos lo tin diferente fundacion di Aruba, manera Fundacion pa Nos Muchanan, Fundacion pa nos Comunidad, FADA y tambe Fundacion Famia di Criansa Arubano cu ta traha activamente pa yuda nos comunidad den asuntonan familiar. Nos ta contento tambe cu nos por a uni forsa cu nan pa sigui traha di manera preventivo na bienestar di e famianan den nos comunidad.
Durante henter aña nos iglesia ta duna herment valioso durante nos curso- y tayernan den tur loke ta trata matrimonio, sexualidad, criansa y preparacion prematrimonial. Tur esaki totalmente gratis pa nos Comunidad. Nos meta ta pa nos logra un sociedad sano y fuerte cu sin duda ta cuminsa door di sigui e principionan di norma y balornan estableci den e Palabra di Dios door di pone Dios central bek den nos famia y bida di cada ken.
Nos ta invita henter pueblo di Aruba pa no perde e oportunidad aki pa inverti den bo famia cual ta e pilar y fundeshi mas importante di nos sociedad.
E ticketnan ta obtenibel na Fitness Warehouse, Espiga de Oro, Fruteria Fruver, Fruteria Virgilio y Gallo Rojo.
Si ta desea mas informacion di e evento y e diferente cursonan familiar cu nos como iglesia ta ofrece por skirbi nos riba nos e-mail: info@ivaaruba.com of yama na e number 699-2057.
Hunto como famia nos ta crea un sociedad sano y fuerte.
