Un stap grandi pa dilanti”, segun diputado James Kroon tocante e anuncio di gobierno pa reserva 30 miyon pa e proximo aña pa asina por drecha e forsa di compra y combati pobresa na Caribe Hulandes. For di 2025 e montante aki lo aumento anualmente cu 32 miyon.
Naturalmente mi ta conforme , pero no lubida cu prijsnan tambe a subi bastante den e ultimo aña. Pa e motibo ei mi ta mira e 30 miyon ei como un paso intermedio. Ta hopi cen, pero e no ta suficiente pa caba cu pobresa. Secretario di estado Van Huffelen tambe ta reconoce esey. Nos ta warda cu ansha riba e rapport di comision Thodé cu lo mester keda presenta comienso di october. E ora ei lo keda demostra con grandi e discrepancia entre e salario minimo, e compensacionnan y tambe loke e hendenan mester di berdad pa por biba di dje”, segun diputado.
Mi ta urgi gabinete pa tuma e consehonan di e comision hopi na serio i pa tuma un decision lihe pa cu e introduccion di un minimo social. Mi no ta pidi solamente pa aumenta sueldo, pero ministerionan mester ta segun mi mas activo den baha e gastonan di costo di bida. Como colegio ehecutivo nos ta cla pa hunto cu ‘Den Haag’ nos incentiva e lucha contra pobresa.” E 30 miyon euro ku gabinete ke inverti extra den 2024 na e islanan BES lo por keda uza pa aumento di e compensacion, e suma adicional pa yiu, transporte publico pagabel i banco di cuminda.
Mas aleu lo bay chek e posibilidad hunto cu dunadonan di trabou i sindicato pa un aumento adicional di e sueldo minimo manera e ta prescribi den lei. “Tur hende, specialmente e hendenan cu e sueldonan mas abou, lo bay nota algo di e contribucion extra. Esey mi ta contento kuné”, segun diputado Kroon.
