Señora Arminda (Liesje) Khemlani a haya un carta di prohibición pa drenta edificio di Parlamento ayera diaranson den oranan di atardi.
Ta trata di e persona cu na momento di reunionnan di Parlamento ta sinta den e parti memey, cu ta atende pa habri y cera microfono di oradonan y otro aspectonan técnico di reunionnan. Pero tambe ta traha den archief di Parlamento.
E carta aki a wordo firma door di Prome Prome Minister mr. Evelyn Wever Croes, ya cu Parlamento ta cay bou di Ministerio di Asuntonan General.
Sra. Khemlani a firma di a ricibi e carta aki pa 3:45 PM y a skirbi na banda “bou di protesta”. Esaki ta indica cu e no a keda mucho contento.
E carta ta bisa cu ta informa sra. Khemlani cu entrante 23 di maart, 2022, e tin un prohibición pa drenta edificio, instalación y hasta autonan di Griffie di Staten. E prohibición aki tin un duración di seis siman, y ta bis’e tambe cu e prohibición aki por wordo prolonga cu maximalmente seis siman y cu e ta bou di investigacion.
A inform’e cu e prohibición di entrada aki ta relaciona cu posibel actonan político cu el a haci cu ta un conflicto di interés cu su trabounan como ambtenaar di Griffie di Staten. Na interés di investigacion y vigilancia di integridad y bon funcionamento di Parlamento, e no por haci su trabou temporalmente.
Pa ley por usa e disciplina aki si algo bai robes. Kico a bai robes precies no a sali afor ainda. No ta conoci ta ki actonan politico, si por ehempel, por ta trata di saca informacionnan confidencial di parlamento y pone den man di cierto politiconan. Ta DRH a wordo yama den e caso aki tambe. Kiermen parse cu ta algo toch serio. E carta ta bisa mogelijke verrichten van politieke handelingen. Kiermen e a bai mas leu cu su trabou, hasiendo politica posibelmente. Cual e no mag como empleado di griffie. Cu mester ta neutral den su trabou. Mirando cu ta hopi fraccion tin den parlamento.
E investigacion lo determina kico a bay robes si of no.
