Den aparato gubernamental tin regla. Pero sigur den cada caso mester tene cuenta cu interes general. Y no por ta pa motibo di flohera, incapacidad of falta di logica di ambtenaar(nan) un grupo grandi di pueblo y empresario(nan) ta wordo perhudica.
Tur medaya tin dos banda y den e caso di e concierto di Duelo de Generos tambe mester mira e situacion di e forma aki tambe.
Na prome luga, Aruba despues di e pandemia a mira masha poco concierto. Y esaki tabata un di e tiki grandinan cu tabata programa pa 2023. Un evento cu promotornan, hincando basta placa den esaki, a bin ta promoviendo pa algun luna caba cu e lo tuma luga riba 15 di april. E situacion ta dificil y finanzas no ta manera antes.
Lamentablemente aunke cu tur e permisonan tabata cla, e promotornan no a logra recoge suficiente placa pa paga Gobierno un suma di placa den e termino stipula, pero a paga esaki dos dia despues. Cu hopi lucha y perseverancia a logra cera e placa y paga e suma aki prome cu e concierto por tuma luga. E parti aki sigur no tabata eror di e promotornan.
A pesar cu a paga e suma en cuestion, ta parce cu ambtenaarnan no ta mira nan email ora cu ta yegando fin di siman y ta laga tur cos pendiente pa otro siman. Esaki ta un ineficiencia, burocracia cu ta causa problema hopi biaha pa inversionistanan. Esaki ta motibo cu Prestatiemanagement ta importante pa wordo introduci, cu ta crea mas eficiencia bou di e aparato gubernamental.
Kico cu e situacion por ta, si e promotornan a paga prome cu e concierto, e ambtenaarnan mester por tabata consciente cu e concierto ta tuma luga den fin di siman y ta pendiente. Prome cu bay cas, wak si e situacion a wordo regla, si e pago a drenta. Esey ta un ambtenaar of un hefe di departamento eficiente. Si no, tuma contacto cu esunnan concerni, cu impuesto pa mira si tur cos a keda regla. Mas ainda pasobra den e caso aki e suma di placa a wordo paga. E caso aki no ta di un persona cu a pidi permiso pa bin traha cu un contracto di largo duracion na Aruba. Ta papia di un presentacion.
E situacion den fin di siman, cu a surgi cu cancelacion di un concierto, por a wordo evita pasobra apesar di tabata dos dia laat, e pago a wordo haci, inclusivo prome cu e concierto, riba dia laboral normal.
Den un caso asina, e prueba di pago ta drenta na DIMAS cu mester pasa e autorisacion na Inmigracion. Na e departamento aki mirando e situacion cu a surgi, unda cu ta papia di mas cu mil persona cu a cumpra carchi y tabata sperando pa e concierto, mester a haci intento pa mira ki solucion por tin, en bes di simplemente pone nan riba un vuelo di regreso pa nan pais. No mester lubida cu e ta un mancha pa Aruba, no e promotor, y tin hendenan cu a bini di Corsou tambe pa presencia e concierto, ademas di e esnan local cu a haci gasto (hende muhenan a bay salon di beyeza) pa ta prepara pa e gran Duelo de Generos.
Segun por a compronde, Minister a bay averigua y a constata cu e pago a wordo haci y tabatin e documentonan pa prueba esaki. Pero debi cu un ambtenaar a dicidi di no proceso loke cu a drenta diabierna, e situacion aki a surgi cu cancelacion di un concierto internacional. A perhudica un gran parti di comunidad y inclusive Gobierno mes, pasobra awo mester cubri e gastonan pa trece e artistanan bek pa Aruba awe. Minister a duna ordo, despues di mira e documentonan, pa laga e artistanan drenta. Sinembargo hefe di Inmigracion no a sigui e ordo. Pa evita demanda, awo mester cubri e gastonan di transporte pa henter e orkesta y e artistanan. Awor Pais Aruba a keda perhudica pa un hefe di departamento cu a dicidi riba su mes pa no cumpli cu ordo di su hefe cu den e caso aki ta gobierno di Aruba y a hinca Aruba den un situacion hopi desagradabel. Mientrastanto, e concierto, cu ta priminti di bira uno grandi, lo tuma luga awe nochi. Y manera bisa, e ta sold out.
