Tur aña FAVI ta conoci pa concientisa e automobilistanan ariba e uzo di garoti blanco strepi cora den trafico. E aña aki e ta bay ta diferente.
Pandemia di COVID-19 a trece cambio, un cambio cu ningun di nos no a pensa ariba dje pero cu ta reta nos diariamente pa nos por sigui cumpli cu e meta di FAVI.
E garoti blanco cu strepi cora ta un simbolo internacional di independencia di e persona cu su bista conoce un limitacion. Durante aña e historia di e garoti a haña un lugar solido unda e persona cu tin limitacion di bista ta forma parti di e comunidad. E no ta keda sera den cas of keda sin bay scol.
Den nos trayecto, FAVI a conoce diferente cliente cu a tuma e curashi di mobilisa y mustra cu nan ta parti di e comunidad. Bo por mira nan na banco, supermercado, na scol y na pia di trabao. Fiel nan ta usa e garoti pa por mobilisa pero mas principal ta pa mustra cu limitacion di bista no ta un obstaculo.
FAVI ta mira e importancia di ta parti di e prevencion di Covid-19 y a scohe e aña aki pa tene e accion na un manera virtual, cual ta hiba e nomber “Ami cu mi Garoti”.
Pa esaki tuma lugar, FAVI kier aserca tur persona cu tin un limitacion di bista y tin un garoti pa participa.
E tarea ta ensera:
- Graba un video con abo ta uza e garoti, entre otro, na scol, trabao, durante un caminata.
- Manda e video aki pa FAVI via whatsapp 5609225. Tambe por post e ariba bo facebook personal y tag FAVI den e video. E concientisacion ta cuminsa diamars 8 di oktober y lo finalisa diahuebs 15 di oktober 2020.
Pa mas informacion por tuma contacto cu FAVI na 5825222.
Nos di FAVI kier a manda un mensahe; Automobilistanan sea mas cauteloso ariba caretera di Aruba y si bo ta mira un persona ta cana cu su garoti blanco strepi cora, corda baha velocidad y si e mester cruza caminda duna e persona aki e oportunidad pa e crusa na un manera sigur.
