ORANJESTAD,Aruba
Diamars atardi durante conferencia di prensa Minister di Husticia mr. Andin Bikker a trece dilanti con leu e concepto di ley pa pisca cu harpun ta. Ministerio di Husticia conhuntamente cu Minister di Transporte, Comunicacion y sector Primario y tambe Minister di Infrastructura y Medio Ambiente ta trahando cu DWZ riba e pro puesto di ley pa por cambia e decreto di 2001 caminda ta prohibi pa pisca cu harpun. Desde 2018 Minister Bikker conhuntamente cu colega Minister encarga cu sector Primario a bin ta traha riba e concepto di ley pero a base di e Natuurbescherming verordening mester a bay un tipo di ronda di consulta. Tin un comision di Flora y Fauna cu mester a duna nan punto di bista y entretanto a haya esaki y pa e motibo aki awor ta finalisando e concepto di ley. Minister Bikker tambe a trece dilanti cu ta evaluando e situacion di Covid-19 pa mira si por introduci un maneho di transicion conhuntamente cu Ministerio Publico, Kustwacht pa mira con pa bay atende cu esaki. E mandatario a bisa cu e ley aki a keda introduci na 2001 y na 2005 e gobierno di e tempo ey a haci cierto promesa mientras cu su ministerio, for di basta tempo ta dunando atencion na esaki, pero falta di capacidad pa renoba e leynan ta hungando un rol. For di 2018 cu a drenta gobernacion mester a duna atencion na otro leynan cu tabatin prioridad pero awor a yega na un punto unda cu e concepto di ley aki ta cla. Minister Bikker ta spera cu pa diabierna awor por trata e ley den Conseho di Minister pa di eynan e por sigui cana su caminda. Mientras tanto ta evaluando un maneho di transicion pero mester evalua tur aspecto pa e maneho di transicion y respeta e leynan. Un biaha mas Minister Bikker a pidi pa carga un tiki pasenshi y den un par di siman por decreta e maneho di transicion riba e tema aki.
