“Cambio” ta e palabra cu por scucha tur caminda rond ora cu ta papia di eleccion presidencial di Venezuela. Segun e diferente articulonan, pa prome biaha oposicion t’asina fuerte, a pesar di diferente obstaculo poni for di momento di registro di candidatonan. Esey ta loke a pasa cu awe Maria Corina Machado su potret ni su nomber ta aparece riba e formulario di votacion.
E candidato cu el a apoya den e contienda electoral aki ta Edmundo Gonzalez. Y esey ta e nomber y e palabra “cambio” cu ta scucha aki na Aruba tambe bou di e votadonan Venezolano. Un di nan ta Vicente Cristoferi , kende a sinti su mes masha emocional pa e eleccion di awe cu ta asina importante pa gran parti di e pueblo di Venezuela. Nan ta roga na Dios pa un cambio
E ta bini di un otro generacion, di siglo pasa cu a conoce e gloria di antes di su pais. “Aruba tabata un pais prospero, cu hopi tipo di mineral. E tempo cu Venezuela tabata produci 3 miyon di bari di petroli pa dia, cada uno balora na 120 dollar. Pues 360 miyon dollar di entrada pa dia. Y awendia e gobierno ta produci solamente 800 bari pa dia. Unda e placa di e tempo ey a keda,” e ta puntra.
E politico Maria Corina Machado a lanta e animo di e Venezolanonan, cu tabata hopi abou despues di hopi cos cu nan a pasa den dje. Incluso algun opositor cu a priminti cosnan cu nunca a cumpli cu nan. Oposicion tambe ta un culpabel di e situacion na Venezuela.
Su famia ta grandi, pero solamente un yiu di dje ta na Venezuela. E resto ta plama rond mundo. El a sinti su mes hopi tristo recordando cu no ta existi mas e celebracionnan di 24 di december y 31 di december den famia. “Union familiar a caba, pasobra algun ta na Chile, otro na Australia y algun na Aruba. P’esey ta pidi ta pidi e Venezolano pa vota cu consciencia. Nos no mester perde speransa. Tabatin hopi obstaculo pa haci cambio di residencia pero no lubida cu e Venezolano tin derecho pa vota.”
El a manda palabra di gradicimento na Aruba cu a ricibi nan y cu a bira nan di dos cas.
Comunidad Venezolano na Aruba luchando pa e cambio te ora cu urna cera
