Compliance na Aruba a mehora y e non compliance a cuminsa bira menos

Un di e puntonan cu semper ta haci dolor  ta compliance, esaki no ta solamente den e comunidad, pero tambe na momento  Belastingkantoor ta eherce nan trabao.  Compliance ta e cumplimento cu e responsabilidad  di impuesto, Segun director di departamento di Impuesto (DIMP) e realidad ta tambe cu ningun Pais rond mundo tin 100% di compliance cu ta significa cu tur hende ta cumpli na ora cu nan debernan di impuesto.

Sinembargo loke cu a ripara si cu e compliance na Aruba  a mehora y e  non compliance a cuminsa bira menos.  Esaki ta significa cu e grupo di clientenan cu no ta cumpli a cuminsa bira menos despues cu Aruba a sali for di pandemia, pero ainda e no ta den e nivel cu belastingkantoor ta spera. 

Tur e clientenan cu tin den e sistema di BBO ta mas of menos  14 mil contribuyente y ta mira cu e comportacion pa cu nan cumplimento nan na tempo y e sumanan cu nan tin cu paga a bay di 60% pa 80%, Segun directora Luenne Gomez Pieters desde cu e la cuminsa na 2015 e compliance tabata na 60% , pero actualmente ta na 80% y ta pusha pa yega na 85% , esaki ta significa cu ta mira cu e contribuyente ta cumpliendo cu e yenamento di e formularionan y ta cumpli cu nan pago. Sinembargo ainda tin un parti cu no ta cumpli.

Loke ta un realidad ta cu digitalisacion ta influencia compliance esaki ta caminda cu e procesonan mester tuma luga mas eficiente. Na momento cu e comerciantenan manera hopi antes tabata para oranan largo den rij pa entrega nan formulario y despues para otro oranan den rij pa haci e pago di e BBO y e Loonbelasting cu nan mester paga ta puntonan cu no ta stimula compliance. 

E comerciante su tempo ta oro y valioso, na momento cu mester perde mas cu 2 ora para den rij enbes di ta den e negoshi pa e por drey optimal  ta haci cu hopi di e incumplimentonan ta tuma luga. Na momento cu e digitalisa e proceso di pago di BBO y Loonbelasting por a ripara cu e comerciante den e confortabilidad di su mes un cas of negoshi e ta entrega su formulario sea ta atardi despues cu nan caba di cera of den weekend cu e comerciante por cumpli prome cu e fecha. Di e manera aki Belastingkantoor ta facilita e comerciante pa por cumpli. 

Sinembargo aunke cu a haci e parti aki caba ainda e compliance no ta caminda cu e mester ta y a bay mira kico mas ta conduci na e comportacion aki. Segun director di DIMP Luenne Gomez Pieters ta mira cu tin hopi negoshinan cu ta haci negoshi cu ta ilegal cu no ta cumpli cu impuesto dus cu nan no ta registra. 

E manera cu por atende cu compliance di e banda aki ta pa haci control unda cu ta bay bishita e negoshinan cu no ta registra y percura pa nan wordo registra y pa nan cuminsa paga, pero tambe por traha cu sistemanan, dus e cobransa di BBO na frontera porehempel y e derecho pa deduci e impuesto di impuesto paga na frontera despues di e volumen di benta  ta conta solamente pa e comerciante cu ta registra naturalmente. Si tin comerciante cu ta importa productonan ta bay carga e servicio di impuesto na frontera y e unico manera cu por deduci esaki ta si nan ta registra na DIMP y si nan ta declara nan BBO manera mester ta. Segun director di DIMP Luenne Gomez Pieters aki ta caminda cu ta bay atende cu e parti di non compliance. Sinembargo aki ta caminda cu ta mira e discusionnan riba facebook , den media y den politica  cu ta bisa cu “ si di un caminda e placa ta bay bin “  Sinembargo parti di e placa cu a wordo presupuesta cu e BBO na frontera ta trece aden cu ne ta e non compliance cu awor aki no tin y cu e no ta drenta e caha di gobierno, pero awo cu BBO na frontera e lo drenta caha di gobierno pa motibo cu e ta wordo cobra na frontera, tambe tin un miho control na frontera y tambe tin e control di esunnan cu ta trece producto aden y cu no ta registra. 

Di e manera aki DIMP ta percura pa tur hende lo mester paga e fairshare na impuesto cu na final ta beneficia nos tur. Si e peso di impuesto ta keda igual of ta bira mas hopi nos ta wak cu e BBO a mira diferente cambionan durante aña nan unda cu e la baha y subi y na final e la bira 7%. Segun director di DIMP Luenne Gomez Pieters si ta for di e grupo chikito aki so e peso di impuesto ta cay riba nan na final nan ta bay paga mas, pero si e 7% ey ta keda igual y ta cay den un grupo mas grandi ta cobre na final di dia nos tur ta paga menos, esaki ta debi cu un grupo mas grandi ta contribui cu e mes un peso di impuesto. 

Segun director di DIMP esaki ta e idea y e trabao di departamento di impuesto unda cu ta garantisa e cobransa di impuesto  mes un cos cu e departamento di Aduana cu na e momentonan aki lo tin un liña extra den nan sistema caminda di e mes un base ta cobra e BBO na frontera cu ta e aduana waarde pa nan.    

Click aki bao like y share