Durante un seremonia militar riba Djaluna 1 di Yüli 2024, den oranan di mainta, ‘Compagnie in de West’ Rotashon 45 a pasa su tareanan pa e siguiente unidat, Rotashon 46. E Komandante nobo Kapitan Jeffrey di e Batayon di Infanteria 13 di Assen, a remplasá su antesesor Kapitan Bernhard, pa medio di e tradishon ‘peddeloverdracht’, ku ta transferensia di e rema, na Kapitan Bernhard.
Kapitan Bernhard ta mira bèk riba un periodo intensivo i spesial: “Komo unidat nos tabatin un tempu útil i durante kua nos a siña hopi. Na tur momentu nos tabata para kla pa ser desplegá. Asina riba petishon di sosionan lokal nos a keda ubiká den e kuadro di operashonnan anti droga, nos a sostené vários aktividatnan pa bon kousa, na Boneiru, i nos elemento EODD (Explosieven Opruimingsdienst Defensie) a keda desplegá vários biaha pa eliminá eksplosivonan i trein sosionan lokal. Banda di esei nos a invertí kontinuamente den nos propio ubikashon mediante organisashon di kursonan di formashon ku hopi reto. Den esaki nos a traha intensivamente huntu ku militarnan di Kòrsou, un periodo riba kua nos ta mira bèk ku hopi positivismo. Nos por a hasi e loke pa kiko nos a bini i a sinti nos mashá bon biní riba e pida spesial aki di nos Reino’’.
Kapitan Jeffrey ta antisipá pa durante e kuater lunanan benidero trein huntu ku e ‘Alfa Demonen Compagnie’ reforsá ku speshalistanan i pa traha den region Karibe. “Ounke tin hopi eksperensia presente den e grupo di ehekutivonan, tantu riba tereno di mishonnan komo na rotashonnan anterior den Region Karibe Hulandes, esaki pa un kantidat di militar ta promé biaha ku nan ta keda pa largu tempu for di kas. E periodo benidero lo wòrdu utilisá pa bira mihó den nos labor bou di sirkunstanshanan klimatológiko pisá. Pa nos ta un chèns úniko pa desaroyá i desafiá nos mes. Banda di e ehersisionan e Compagnie en todo kaso lo ta kla pa sostené habitantenan di Region Karibe den kualke kalamidat, durante kua nos presensia ta nesesario”, sigun Kapitan Jeffrey.
“Compagnie in de West’ (CidW), Trupanan den West, ta un unidat permanente di Ehérsito Real ku, bou di dominio di (Commandement der Zeemacht in het Caribisch Gebied) CZMCARIB, por keda desplegá pa un variedat di tarea. E kuater lunanan benidero e Compagnie ta trein na tantu Aruba, Boneiru komo Kòrsou.
