ORANJESTAD,Aruba
Parlamentario Setty Christiaans-Yarzagaray ta duna di conoce desde final di maart cu Aruba a bisa te oro na vuelonan comercial y cu a ricibi e ultimo biahero residente di Aruba, a yega momento pa cuminsa prepara pa bisa bon bini bek na bishitantenan na pais Aruba. E crisis mundial causa pa Covid-19 a yega tur skina di mundo y Aruba no a scapa. No ta un secreto cu e efecto di e pandemia di Covid-19 tin impacto hopi drastico riba e sistema di salubridad, economia y finansas di mundo y di pais Aruba. Ta dificil premira realmente con diferente economia y turismo lo desaroya despues di e efecto di e pandemia aki. Mirando e situacion cu Aruba ta aden, mester cuminsa prepara con ta bay habri frontera bek y ki protocol lo pone in place pa re-activa y stimula economia. E pueblo trahado, famianan, negoshinan y gobierno ta depende di esaki pa nan existencia.
Minister di Turismo, Salud y Deporte a comparti informacion
Apesar cu nos por ta contento cu actualmente Aruba no tin caso positivo di Covid-19, no ta kita cu mayoria parti di mundo ainda e pandemia ta ful activo. Aruba awor ta miho prepara compara cu momento cu a registra su prome casonan di Covid-19. A expande e capacidad di medicamento, di personal, di ventilators y di unidad di ICU. Pues e parti di salud mester ta bon cubri pa e momento di habri frontera bek. Mester ta prepara pa e posibilidad cu una bes cu permiti bishitantenan drenta Aruba bek, cu por registra caso positivo atrobe.
Pa esaki lo tin un sistema na aeropuerto di bodyscan, ful un ekipo medico y aeropuerto lo ta un sitio pa haci test. RIVM di Hulanda tambe ta asisti Aruba den e proceso aki na unda protocolnan a ser estableci pa prome cu yegada (pre-arrival) y tambe despues di yegada (post-arrival) di biaheronan.
Lo introduci un App pa haci contact tracing momento cu detecta cu tin pasahero positivo di Covid cu lo link cu celular di e biahero. Lo tin procedura in place pa famia di pasaheronan tambe cu a wordo detecta cu Covid cu lo wordo transferi pa un lugar specifico di hospedahe.
Presentacion di Aruba Tourism Authority (ATA)
Durante un presentacion den Parlamento, e CEO di ATA cu ta forma parti di e cluster team, a informa di investigacionnan cu a haci pa asina tin un idea di sentimentonan di biaheronan. A haci pregunta por ehempel si lo considera pa biaha pa un otro destinacion cu no ta Aruba.
A duna indicacion tambe di cantidad di vuelonan cu aeropuerto di Aruba ta premira di ricibi pa siman. Cu e informacionnan aki a presenta scenarionan con Turismo lo bay recupera den tempo nos dilanti. Pa awor ta calcula cu momento cu habri frontera bek lo bay na 20% di capacidad. A papia cu Aruba lo bay ricibi 2,000 bishitante den un siman, contrario na prome cu Covid cu Aruba tawata ricibi un averahe di 20,000 bishitante pa siman. Ta premira un caida den Turismo pa aña 2020 di entre 55% pa 70% hibando Aruba bek den categoria di aña 1992.
Aruba ta bay exigi un online ED-card obligatorio prome cu biaha y tambe lo mester yena un relato di declaracion di salud cu lo wordo inclui na e ED-card. Ta bay pidi bishitantenan pa download un App cu ta contene informacion di kico pa haci, unda pa yama y ki procedura mester sigui. Tambe a introduci un Aruba Health & Happiness Code. Meta di esaki ta pa eleva e nivel di higiena y protocolnan di limpiesa (sanitation) na un nivel cu bishitantenan y localnan ta demanda como parti di e normal nobo cu nos mester biba aden. E code aki ta sirbi tambe como standard pa limita of mitiga contagio di e virus.
Lo tin inspeccion na establecimentonan pa cual si logra pasa esaki lo ricibi un seyo y cada negoshi por logra yega te na e seyo di oro cu ta indica cu nan ta cumpli cu checklist y inspeccion on-site. Na un prome etapa negoshinan cu lo wordo inspecciona lo ta acomodacionnan, establecimentonan di F&B, trucknan di cuminda y tiendanan den retail. Depues lo amplia esaki cu casino, taxi, car rentals, tours y spa.
Pa conclui Despues cu dia 28 di mei ultimo Aruba a registra 0 caso activo di Covid y maneho di salud pa cu Covid ta bou control, a yega momento pa pensa con pa recobra entradanan bek pa pais Aruba. Turismo como pilar principal di fuente di entrada mester wordo re-activa y pa maneha efecto riba salud di tanto nos habitantenan como nos bishitantenan mester considera habri frontera gradualmente.