A nombra dos miembro nobo den e Comision di Condecoracion Real. Sra. Lusette Verboom a keda nombra como presidente di e comision y sr. Eithel Hato tambe a keda nombra den e comision. Tur aña di nobo un grupo den nos comunidad ta ricibi reconocemento di rango halto, cual ta un Condecoracion Real. E comision di Condecoracion Real tin e meta pa canalisa e proceso di postulacion di candidatonan.
Actualmente e comision di Condecoracion Real ta consisti di Sra. Lusette Verboom, Sr. Trevor Bakhuis, sra. Maria Liberia Peters, sr. Eithel Hato y sra. Marisol Roosberg. Mesora ta haci uzo di e oportunidad pa gradici sr. O’dennis Daal cu a fungi como presidente durante e ultimo 2 añanan y ta dese’é tur clase di exito.
E oportunidad pa postula un persona ta habri te cu di dos siman di september y ta descurasha comunidad pa postula personanan cu di un forma of otro a bin ta haci trabou boluntario pa adelanto di nos sociedad. Por postula ciudadanonan cu a duna un aporte excepcional pa sigur 10 pa 15 aña, como boluntario of ciudadano cu a duna un aporte extraordinario banda di nan trabou. Tin diferente categoria di Condecoracion Real. E dos categorianan mas usual na Corsou ta Orde van Oranje Nassau y Orde van Nederlandse Leeuw. Den e categorianan aki tin rango di Lid, Ridder, Officier y mas. Conforme e aporte excepcional y extraordinario di e persona e ta haña un condecoracion como lid of ridder, cu ta esunnan cu mas sa otorga na Corsou.
Pa ricibi un Condecoracion Real e persona mester a contribui di forma excepcional na nos comunidad. E contribucion por ta sea pa medio di su aporte na bienestar di hoben, adulto of nos grandinan. E persona mester a haci trabounan boluntario, sin pago of salario, pa un temporada di sigur 15 aña y cu a dedica algun ora pa siman na esaki. Tambe un persona cu a contribui of destaca di forma excepcional den deporte, enseñansa of ciencia na Corsou por bini na remarca pa ricibi un Condecoracion Real.
Abo por postula un candidato y asina contribui pa un persona haña e reconocemento cu e merece na nivel di Reino Hulandes. Pa postula bo candidato bo por bishita e pagina gobiernu.cw/kondekorashonreal, download y yena e formulario y entrega bo peticion na Bentana di Informacion na Saliña. Hunto cu e formulario mester entrega algun documento importante tambe. Banda di informacion di contacto di e candidato, mester entrega informacion di trabounan di e persona postula, hunto cu afirmacion di dos otro persona.
