No ta haya Arubiano pa ocupa cuponan di trabou habri. E situacion ta un poco dificil pa doñonan di trabou den diferente sector. Ta busca trahado pero no ta logra yena e espacionan habri.
A haya informacion for di diferente doño di trabou, kendenan ta bisa cu e falta di trahado aki ta conduci na un servicio deficiente, den tur e sectornan di trabao ta birando un dolor di cabes.
Manera ta conoci, Gobierno a dicidi di wanta peticionnan pa importa trahadonan. Durante inicio y desaroyo di COVID, un grupo grandi di trahadonan stranhero a haya nan mes obliga pa bandona Aruba, pa motibo cu tabata tarda pa habri y nan no por afford keda sin trabou. Sinembargo te ainda no a habri mercado y doñonan di trabou ta preocupa.
No ta haya Arubiano pa traha y of cu kier traha pa yena e cuponan di trabou cu tin habri aworaki. Esaki ta causa strañesa pasobra tin un grupo grandi di Arubiano cu toch ta depende di onderstand, cual sigur ta menos cu e salario minimo. Probablemente pasobra nan lo ta trahando “zwart” otro caminda. Otro splicacion no ta haya cu un persona no ta interesa pa haya sigur un salario minimo. Aworaki e ayudo cu ta haya for di gobierno ta rond di 900 florin pa luna.
Papiando cu e doñonan di trabou por a scucha mas splicacion pakico no ta haya trahado. Esnan cu ta bin solicita tin diferente obheccion. Entre otro nan no kier traha shift. Ta prefera di traha un solo horario. Of nan ta bisa tambe cu no ta interesa pa traha den fin di siman. Nan kier un trabou mas bien cu ta cinco dia pa siman. Y riba dje sin cu nan tin mas cu un diploma kier un salario di casi 3 mil florin.
Ta un hecho cu apesar di cuanto aña di experiencia, un waiter, bartender, housekeeping, saca potret, telefonista, limpiesa, security, etc., no por cuminsa un trabou ganando 3 mil florin. E posicionnan cu ta cuminsa gana e nivel di salario aki ta esnan cu a haci un estudio mas cu un HAVO of VWO , en general. Tin trabou cu por yega un salario asina, pero ta trabou duro y tin biaha den solo. Den hotel por ehempel, lo por yega un entrada asina, cu tipsnan ricibi.
E situacion ariba menciona ta encera cu mester crea strategia pa pone e Arubianonan bay traha bek. Motiva nan pa traha y crece den un posicion nobo, sigui cursonan di Enseñansa pa Empleo pa sigui bay dilanti. Y evalua si no ta momento pa cuminsa habri mercado poco-poco pa busca hende pa diferente posicionnan cu realmente no ta haya e Arubiano pa esaki. Nos Arubiano nan mester ta mas consiente cu Aruba ta depende di nos tur , nos tin e responsabilidad di traha y drei e economia cu ta di nos Pais. Loke ta un realidad di nos mes como Arubiano no realisa e importancia di bay traha, A yega ora pa gobierno evalua si t alaga e posibilidad pa trahadornan di afo bin yuda economia di Aruba y of duna oportunidad na esnan cu ta aki caba pa Aruba por sigui prospera.