Den centro di ciudad CUA a yama un conferencia di prensa unda cu mayoria miembronan di CUA tabata presente, Minister di Economia Geoffrey Wever y directornan di Banco.
Presidente di CUA Frans Ponson a hiba palabra e mainta aki y ta duna di conoce cu no ta un secreto cu caya a keda bay atras. Den pasado a intenta diferente opcionnan, pero no tey pa punta dede kico ta traha y kico no, pero tabata bon cla cu na final di dia caya ta cerando. CUA a tuma nota cu gobierno a duna permiso na Palm Beach pa ta un exito y e ta un exito awe. Aruba ta boeming den area di hotel unda cu turistanan ta frecuenta, pero loke cu ta un realidad ta cu Oranjestad ta e capital di Pais Aruba.
Na un momento cu un turista bin bishita Aruba y pasa den e centro di e Pais e ta duna un imagen di bo Pais y manera cu e ta actualmente e no ta esun di mas miho. Pa e motibo aki mes nos tin cu haci algo, asina presidente di comerciantenan uni Frans Ponson a indica.
Pa e motibo aki mes a bini hunto y a haci invitacion na Banconan tambe pa por mustra con importante caya grandi ta pa Aruba. Nos tur hunto mester haci algo debi cu no ta un hende so por haci e cambionan aki. Actualmente tin diferente proyectonan den caya grandi cu ta di miembronan di comerciantenan uni, pero tambe tin di e comerciantenan cu no ta miembro di CUA cu ya caba a inverti of cu kier bay inverti.
Tempo cu tur cos a move bay palmbeach caya grandi a cuminsa bay atras, pero ainda tin e inversionistanan local cu si a keda kere den caya grandi y cu a inverti y cu awe ainda ta existi. Sinembargo esaki ta un grupo chikito, pero nos tin cu bay haci cambio grandi pa drecha full Oranjestad.
Sinembargo a tuma nota cu den e ultimo temponan aki gobierno aki a trece cambio nobo unda cu tin cambio den Wilhelminastraat unda cu tin hopi inversionnan door di gobierno cu e inversionistanan y e local nan ta contento. Tambe por a tuma nota cu Minister Geoffrey Wever a publica siman pasa cu ta bay tin un studentenflat den e ex edificio di OM, sigur esaki ta un bon iniciativa y ta sostene esaki. E proyecto di studentenflat lo trece movecionnan riba caya unda cu lo yuda e comerciantenan y sigur e comerciantenan kier para tras di esaki.
