Corsou a marca un momento historico na momento cu e botonan di tou Manta y Ola y e boto NC 6-L di Compania di Tou Corsou (KTK) a guia e barco Colon pa mara na Bullenbaai Jetty-1. E barco Colon a bin cu un carga di 600.000 bari di ‘fuel oil’ pa almasena na nos terminal. E terminal di Bullenbaai ta un terminal caminda normalmente ta almasena crudo na gran escala. Durante di e ultimo 4 simannan, Curaçao Refinery Utilities (CRU) a realisa hopi trabou pa percura cu e terminal ta cumpli cu e normanan di siguridad halto rekeri, y alabes a comberti parti di e terminal den un terminal dedica specialmente na almasenahe di ‘fuel’. Entretanto CRU a bolbe duna oportunidad di empleo na 20 ex-trahado. Aumento di actividadnan na e terminal na Bullenbaai sigur ta nifica mas actividad pa KTK tambe.
E barco Colon a trece e prome carga di productonan petrolero pa almasena na Bullenbaai como parti di e acuerdo entre CRU, e compania subsidiario di Refineria di Corsou (RdK), cual ta permiti Caribbean Petroleum Refinery (CPR) almasena producto na e terminal di Bullenbaai. E acuerdo di almasenahe ta para los for di e acuerdo di mas aña pa operacion di refineria y e terminal na Bullenbaai cu Refineria di Corsou y CPR ta negoshando actualmente. E acuerdo ta encera cu lo por almasena te cu 7 miyon bari di producto na e terminal.
CRU y RdK tabatin basta trabou di preparacion prome cu por a cuminsa ricibi producto pa almasenahe na Bullenbaai atrobe. E trabounan a keda conclui net na tempo pa por a ricibi Colon como prome barco. E terminal awor por almasena 2.4 miyon bari di fuel oil, 4.1 miyon bari di crudo y 350 mil bari di ‘diesel’. CPR lo haci uzo di henter e capacidad di almasenahe, pues por spera mas barco cu producto pa almansena proximamente na Bullenbaai. Aumento di actividadnan na Bullenbaai ta contribui na sosten di KTK como un di e servicionan cu ta vital pa realisa apertura di nos refineria.Mientrastanto, e negociacionnan entre RdK, Gobierno di Corsou y CPR ta canando cu e meta firme pa yega na un ‘Heads of Agreement’ mas pronto cu ta posibel
