Dr. Rene rosalia di kousa prome a indika for di un prinsipio
Mientras Premier Rhuggenaath ku minister Martina a firma akuerdo ofisial pa aseptá COHO Raad van State ta deklará COHO un lei ilegal enpugna ku Statüt. Lider Polítiko di Kousa Promé dr. Rene Rosalia a deklará for di kuminsamentu ku COHO ta ilegal i inaseptabel pa un gobièrnu ku ta respetá su mes. COHO a resultá un berdadero akto di terorismo estatal hulandes. Hopi entidat i polítiko sin dignidat propio a reakshoná bisando ku no por kome outonomia. A uza strategia di intimidashon insinuando ku COHO ta e úniko solushon pa país Kòrsou i si no aseptá esaki ta será tur kranchi.
Awe Raad van State ta deklará COHO ilegal. Pero Raad van State no tabata kompletu, e falta un parti mas den su konseho. E no a rèp niun solo palabra riba responsabilidat di Hulanda komo firmante di e Karta Magno di Nashonnan Uni. E responsabilidat mayó di Hulanda ta ku e derechi i debernan ankrá den Karta Magno ta superior na loke tin pará den Statüt. Pues Hulanda komo pais kolonisadó a violá Statüt i tambe Karta Magno di Nashonnan Uní. Ta opvio ku mester keda vigilá e kolonialnan hambrá hulandes. E gobièrnu di Rutte no ta obligá na kambia nada nada di COHO. E por disidí di sigui fòrsa Kòrsou pa sukumbí. Kousa Promé ta rekomendá gobièrnu Pisas pa no aseptá COHO i pa bai mas leu i denunsiá Hulanda na Nashonnan Uní i hiba nan “International Court of Justice”. Akusá nan di ta violá Karta Magno i di a blokia Kòrsou finansieramente bou di preshon pa e sukumbí i aseptá COHO. Hulanda konsientemente a blòkia Kòrsou i a kita su poder outónomo pa fia plaka riba merkado lokal i merkado internashonal pa hiba su propio maneho finansiero i ekonómiko. E blokeo ta enserá ku Kòrsou por fia plaka unikamente serka Hulanda i niun otro kaminda mas. Ni lokal ni internashonal. Esaki ta un maniobra diabóliko di e estado pirata Hulanda. Maniobranan di Hulanda huntu ku PAR i MAN pa gana Kòrsou riba rudia i pa kaba di poderá di Kòrsou su rikesanan i su posishon geopolítiko stratégiko aki den Caribe. Kòrsou komo trampolín pa komèrsio hulandes spesialmente den horeca, aviashon, narkotráfiko i gambling digital. A resta nos e úniko posishon korekto pa eksiguí Hulanda pa respetá lei i tratadonan internashonal i pa kita man for di outonomia di Kòrsou. Pa solushoná e problema di pobresa i desempleo Kousa Promé ta rekomendá gobièrnu Pisas pa emití bono riba merkado lokal pa yega na fondo propio pa salba Kòrsou. A yega e momento pa Kòrsou demostrá ku e por para korupshon i kambia rumbo pa e salba su mes. Awor ta na e gobièrnu nobo di señor Gilmar Pisas pa sali dilanti pa Kòrsou a base di patriotismo. Amor real pa Kòrsou i e yu di Kòrsou. E úniko lucha ku bo por pèrdè ta esun ku bo bandoná. Kousa Promé t’ei pa keda.
1 comment