E mensahe di fin di aña di partido AVP, a resona cu un tono determina pa cambio! Y a declara aña 2023 e aña di cambio!
Candidato di Partido AVP experto den mundo di utilidad Clifford Heyliger a refleciona den su discurso ariba e sufrimento di nos comunidad causa pa e maneho energetico desastroso di Gabinete Wever-Croes. Clifford Heyliger a remarca cu “Na 2022 Pueblo a resulta di ta e gran perdedo! No pa motibo di niun pandemia of guera na Ukrainia, pero pa motibo di terkedad, arogancia y negligencia di gobierno di Aruba. Riba tur tereno tabata tin aumento di prijs pero Gobierno por a sauvisa e golpi si a hiba un miho maneho”
Clifford Heyliger a enfatisa cu falta di capacidad ta causando dolor den nos comunidad y cu evidencia di esaki ta aumento drastico di prijs di awa y corriente cu ta afecta y corta den e poder di compra di e nos comunidad.
Ademas di incapacidad e aspecto di inmadures politico ta precupante, segun Clifford Heyliger. Si a continua cu e plan di energia sostenibel “Green 2020” di partido AVP cu lo a percura pa expansion di energia di biento y solo, awe por e evita e aumento drastico di prijs di utilidad cu ta causando hopi sufrimento den nos comunidad. No solamente esaki, pero si e permiti WEB HEDGE na e momento oportuno manera experto nan a indica, awe e scenario lo tabata diferente. Pero pa inmadurez politico di gabinete Wever-Croes nos pueblo ta sufri!
Clifford Heyliger a termina su discurso plantando un pensamento interesante. E la indica cu “e Bon Comun, e pensamento di traha pa Pueblo sin spera niun beneficio propio, mester bira nos guia y e base di tur desicion den y pafo di gobierno”, y asina a finalisa deseando Aruba un felis cambio di aña 2023 y yamando nos comunidad pa hunto realisa e cambio cu nos tur anhela. E bon comun como pensamento den gobernacion ta precupra cu bienestar y progreso ta yega den cada cas y cada bario den nos pais.