Manera ya ta conoci den nos comunidad, Stichting FUNARI, ta un entidad cu un trayectoria cu mas di 45 ana, den planificacion y ehecucion di projecto y programa nan pa tur esnan descapacita na Aruba, pero cu kier desaroya nan mes pa por hiba un bida mas independiente. Esaki ta un grupo cu mester di tur debido atencion y cu danki na e programa nan cual ta wordo disena strategicamente, a logra cu hopi ta esnan cu por a hasi un diferencia cu nan talento of conocemento, cual den pasado nan no tabata kere ta posibel. Adicional di e tipo di programa nan diario cu e FUNARI tin disponibel na nan Centro na Savaneta, e Stichting ta organiza tambe diferente programa nan social, cual ta sirbi pa stimula e cliente nan pa participa of sali y experencia actividad nan diferente, pero cu tin alavez un balor agrega na nan desaroyo psycologico como tambe fisico.
Recientemente, un total di 12 cliente di Funari hunto cu e coordinadora di Funari, Sra. Brenda Rasmijn y un grupo di voluntario, a disfruta di un dia sumamente placentero na Mangel Halto. Esaki tabata posibel, danki pa e cooperacion di e team Cuerpo di Bombero.
Nan a duna un tremendo cooperacion pa duna asistencia na e cliente nan cu tabata den rol stoel of cu dificultad pa move, pa nan tambe por a forma parti di e dia aki. E sonrisa nan projecta mediante e relato fotografico sigur ta confirma esaki. Un aspecto di suma importancia cu nos mester tene na cuenta ta, cu cualkier actividad diferente di locual e cliente nan ta custumbra pa hasi, ta un estimulo y therapia pa nan por hasi ejercisio tanto fisico y mental cu sigur ta contribui pa nan desaroya nan mes y reconoce nan potential pa surpasa cualkier miedo of insiguridad cu nan por tin. Pa nan sorpresa, Sr. Louis Wernet, un voluntario di Funari a bin celebra su hasimento di ana cu e grupo pa asina hasi e dia ainda mas special pa e cliente nan.
E grupo di cliente a disfruta di nos lama na un localidad di Aruba cu hopi biaha, ta dificil pa nan por tin aceso na dje. Danki na e bon coordinacion y cooperacion di e team di Funari cu a organiza e evento aki como tambe e cooperacion duna door di voluntario nan y Cuerpo di Bombero, tur cliente a disfruta di un dia diferente y inolvidabel. Na final di dia, e cliente nan a wordo transporta bek na nan hogar. E logra principal pa tanto e Bestuur como e team di FUNARI ta, cu tur cliente a disfruta di un actividad exitoso pero cu a duna nan alavez e satisfaction y confirmacion cu nan limitacion no ta un motibo pa cual nan no por hiba un bida jena di momento nan di alegria, mescos cu cualkier otro habitante den nos comunidad.
“ FUNARI, DUNANDO E GUIA Y MOTIVACION, PA UN LIMITACION NO MESTER TA
