No falta mucho pa tres luna pasa pa gobierno dicidi di lo bay habri frontera aereo. Tin dos frontera cu ta cera pa local nan. E frontera pa avionnan comercial, pero frontera pa avionnan di carga pa avionnan local paso e avionnan internacional di carga si por haci nan trabao manera nada no a pasa. Sigur un situacion fastioso cu ta horca tanto local nan cu tin famia na Venezuela of cu ta bay pa dokter cu avionnan comercial, pero tambe companianan cu ta trece productonan pa comercio di Aruba pa asina e economia drey manera nos tur ta custumbra cu ne. Den un conferencia di prensa EA news a puntra prome minister di Aruba riba e situacion lamentabel aki cu companianan nacional ta restringi y companianan internacional si por trece nan carganan via di Curaçao y esaki si ta posibel.
Sinembargo e frontera maritimo si a keda habri prome di mei y esaki a tarda mas of menos 4 siman pa carganan di fruta por e bin Aruba. Segun prome minister di Aruba te na e momentonan aki ta hopi satisfecho con e proceso ta bay y ta mira cu tur hende ta tene nan mes na palabracionnan y acuerdonan haci unda cu Aruba ta ricibiendo fruta y berdura y tur otro producto cu por bin for di Venezuela cu ta yegando Aruba cada pasa un siman y cu Aruba tin acceso na productonan di berdura y fruta. Tambe a tuma nota cu tin algun fruteria cu a baha nan prijs considerablemente y gobierno ta gradici tur e comerciantenan di curason na tur esunnan cu a logra baha e prijsnan. Tambe ta consciente cu no ta tur comerciante a baha nan prijsnan of cu por a baha nan prijsnan.
Pa loke ta trata e frontera aereo gobierno di Aruba ta indica cu no ta cla ainda pero cu prome di mei ultimo a caba di prolonga e ciere cu tres luna cu ta den termina den luna di juli nos dilanti. Segun prome minister di Aruba e comision cu tin actualmente a duna conseho y actualmente ta trahando riba diferente aspectonan pa asina por yega na un re apertura, pero na momento cu ta asina leu lo anuncia.
E comision ta trahando riba e re apertura di frontera aereo den fase y den e prome fase nan ta complementando carga y ta mirando e miho manera con e por pasa, segun e mandatario
Probablemente denter di poco lo por anuncia cu e frontera aereo pa carga tambe por wordo habri bao di diferente condicionnan y segun prome minister esaki mester keda negosha cu e autoridad nan Venezolano tambe y di nan banda segun minister Evelyn Wever Croes nan ta dispuesto pa negosha tambe.
Na mes momento e echo cu a caba di prolonga e ciere di frontera aereo cu tres luna lo no stroba pa por habri frontera di carga. Si e comision keda cla den dos siman hunto cu Venezuela y nan a keda acorda cu e comision por haci e cambio sin ningun problema pa frontera aereo, pero por lo pronto ta extende e ciere di frontera aereo.
Sinembargo loke cu ta un realidad cu carganan di Venezuela ta drenta Aruba, con nan ta drenta Aruba cu avionnan di carga internacional y e avionnan di carga local mes ta man mara door di e maneho di gobierno actual.
Pero pa prome minister Evelyn Wever Croes e problema no ta si carga por bin of e no por bin, pero e problemanan ta e vuelonan directo entre Aruba cu Venezuela no ta posibel. Pero na mes momento ta compronde cu tin local nan di avionnan di carga cu kier haci vuelonan via Curaçao pa Venezuela, esaki directie luchtvaart na e momentonan aki ta mirando e aspectonan tecnico si ta posibel cu e avionnan di Aruba por bula via di Curaçao pa Venezuela y si acaso e no ta posibel cu directieluchtvaart ta duna e permiso, e ora e compania lo mester traha un plan di vuelo entre Aruba /Curaçao- Curacao /Venezuela pa cumpli cu e rekisitonan. Sinembargo no ta un secreto cu tin vuelonan cu ta tumando luga di avionnan di carga internacional, pero gobierno tin un cabuya na garganta di su propio hendenan cu no por haci e vuelonan aki pa motibonan y decisionnan politico cu mester keda haci na bienestar di Aruba y e comercio di Aruba.
aruba tin e frontera cera pa diferente motibonan y di diferente indole y angulo y ta kere cu mester regla tur cos bon prome, segun prome minister Evelyn Wever Croes.
Pero na mes momento tin operacionnan si andando y cu carga nan di Venezuela cu ta yega Aruba , pero e unico diferencia ta cu no ta trata di nos local nan cu ta beneficia di esaki pero companianan internacional cu e mes un gobierno ta permiti esaki.
Si mester mira e situacion bon ta claramente cu gobierno tin cabuya na garganta di comercio y comerciantenan di Aruba cu ta trata di hiba e pais aki dilanti, pero debi na un mal maneho y no ta trahando activamente pa Aruba no ta mira cu pasonan ta keda tuma, of ta e minister cu tin e cartera no ta capacita pa tuma decisionnan, paso si mester mira tur su carteranan ta blunder tras di blunder so a keda haci den tur cartera y ningun solucion pa e pueblo di Aruba mes. E ta bisto cu ningun di e carteranan di minister Ursell Arends ta na su luga y ningun di nan no a bin cu solucion, pero ta mira claramente puro show y papiamento y nada haci pa Aruba.
E situacion di frontera di carga cu ta cera no ta trata di un situacion di awo, pero e frontera di avionnan di carga ta cera pa algun aña caba cu gobierno ainda no tin un fin pa tuma cargo di nan trabao y traha pa e pueblo di Aruba por sigui drey y economia por sigui drey pa nos tur por sigui crece aki na Aruba.
Awo Prome minister di Aruba Evelyn Wever Croes den conferencia di prensa ta duna di conoce cu si e compania di Venezolano traha un plan di vuelo di Venezuela/curacao- curacao /Aruba – Aruba /Curacao- Curacao Venezuela, segun e mandatario e ora si avionnan di carga di Aruba por cumpli cu ne y lo bay wak si directieluchtvaart por cumpli cu ne.
1 comment
[…] Source link […]