E aña aki Horacio Oduber Hospital (HOH) lo ta presente un bes mas durante Aruba College
Fair cu lo ta tumando luga den Renaissance Convention Center riba dia diabierna 8 y 9 di
november for di 1:00 pm pa 7:00 pm.
Cathleen Hernandez, Stagecoördinator HOH Academy, a comenta cu HOH lo t’ey na booth
number 21 y number 22 p’asina informa e hobennan tocante e oportunidadnan cu tin na
hospital y den e mundo medico. Ta e intencion pa HOH informa e hobennan si acaso nan tin un
duda riba nan estudio of si nan tin interes caba den e mundo medico y ta desea di elabora mas
riba e topico aki cu un profesional.
Durante Aruba College Fair, lo conta cu presencia di diferente departamento manera
Laboratorio, Operatie Kamer (OK) y tambe lo conta cu presencia di diferente trahado di
functiekamer cu lo t’ey presente pa duna mas informacion tocante nan disciplina. Lo tin
oportunidad pa haci nan pregunta, mira demostracionnan interesante y hasta lo por train un ke
otro.
Importancia pa recluta hoben
Ta hopi importante pa e hobennan wordo inspira pa sigui studia den e ramo medico, pa motibo
cu semper tin necesidad pa profesionalnan den e mundo medico. Mundialmente tin un
scarsedad di trahado den e ramo di medicina. Sra. Hernandez a expresa cu pa HOH e
scarsedad no ta algo diferente, e hobennan ta e futuro pues mester sigui informa nan y inspira
nan pa sigui traha den un di e ramonan di trabou di mas bunita cu ta existi esta brinda cuido
medico y miho ainda di calidad na bo comunidad.
HOH ta warda bo
“Si trabou den e mundo medico ta interesa bo, si bo tin duda ainda y kier sa mas nos ta invita
bo pa pasa na nos booth riba dia 8 y 9 di november pa asina bo por haya mas informacion” di e
manera aki Cathleen Hernandez ta invita comunidad di Aruba pa bishita Aruba College Fair.
