Cindy Lauwereys a bira empleado di luna di juli 2023 na HOH

E tin hopi empeño y precision pa su trabou 

Tur luna Horacio Oduber Hospital (HOH) ta elogia un colega cu di un forma of otro ta destaca y na juli 2023 por fin despues di hopi tempo a toca turno na departamento di Botica na unda asistente Cindy Lauwereys a wordo nomina y a sali empleado di luna. Asina cu Cindy a yega bek su departamento despues di un respondi di trabou den HOH mes, ela wordo sorpresa pa ful su team di colega compaña pa miembronan di Hunta di Directiva y tambe su famia.  E no a sospecha nada pues un sorpresa hopi bunita cu a laga Cindy sin palabra. 

Ora cu na aña 2013 Cindy a haci su stage den departamento di botica ya caba por a mira e amor cu e tin pa cu su trabou. Despues di su graduacion Cindy a haña oportunidad pa solicita y desde prome di januari 2016 e la wordo emplea door di HOH. Su team completo a nomina Cindy pa cinco motibo di ‘oro’ esta: e tin un curason noble, tin hopi pasenshi, ta comunica bon cu tur coleganan, ta dinamico y ta cla pa yuda tur hende cu pidie.

Cindy ta ehecuta su trabou cu hopi responsabilidad y riba un alto calidad. E ta representa su team di botica cu integridad y confiabilidad. Su ‘werkethiek’ y manera di traha ta sublime; semper na ora y ta termina su trabou prome cu bay cas. E trankilidad y paz cu Cindy tin ta caracteristicanan excelente pa guia stagiaires y empleadonan nobo cu join e team di botica.

Ademas, Cindy semper t’ey cla pa scucha preocupacion di pashent y hunto cu su team ta traha duro pa yega na un solucion. Hopi persona lo por confudi y kere cu Cindy ta un persona timido, pero Cindy ta vocifera su opinion den un manera firme pero amigabel ora ta necesario. Banda di su tareanan laboral Cindy tambe ta den e grupo cu ta prepara oncolytica, esta remedi pa tratamento di cancer, y policlinica unda su capacidad y habilidad ta un aporte grandi na mehora y inova e procesonan den tur dos grupo.

Su team tin hopi na dje y tin biaha nan ta yama Cindy e ‘human terabyte’. E tin un memoria increibel. E ta corda tur cos y sa unda tur cos importante ta fuera di tin un tremendo conocemento tecnologico. Un colega sublime y semper cla pa yuda su team den esaki.

Hospital ta orguyoso di tin Cindy como parti di su team. Un bunita reconocimento pa colega Cindy cu ta traha cu hopi dedicacion pa su trabou y asina ta contribui na eleva e calidad di nos cuido medico na Aruba. Masha pabien Cindy!