Awenochi ta un dia hopi importante y esencial pa mundo di deporte, principalmente bao di e halanan di Arubaanse Voetbal Bond AVB cu ta maneha clubnan di futbol na Aruba. No ta for di awo y no ta un secreto for di basta tempo caba club nan na Aruba ta wordo engaña y ta wordo manipula cu lo atende cu nan manera debe ser.
Sinembargo te awe nada no a sosode ainda, aña pa aña e situacion ta bira mas pio. Ultimo eleccion e mes un bestuur y presidente cu ta sinta actualmente a campaña fuerte cu e mes un speransa pa cambionan, sinembargo por bisa cu nada no a wordo haci y cosnan a bira pio cu Aruba no ta bon para den cara di FIFA manera cu ta wordo treci padilanti.
E realidad ta cu e bestuur actual enbes di a mehora manera nan a campana algun tempo atras no a percura pa drecha nada , den henter 2 aña sinta no a percura pa structura, no a percura pa atende cu e retraso y no a percura pa pone e jaarrekening 2021 y 2022 cu consecuencia cu awe debi na esey Aruba su futbol no ta haya e placa cu e merece for di FIFA, berdad cu FIFA a bin Aruba, pero e realidad ta tambe nan no a bin specificamente pa e veld di FIFA, pero pa mira y atende e administracion cu ta un total caos cu ta pesey FIFA tin Aruba su placa wanta.
Mirando e mal maneho aki e club nan tambe ta keda afecta, pero e holoshi a cuminsa cana pa e bestuur na e momentonan aki y clubnan no ta contento cu e maneho cu a hiba y e puntonan cu nan a campana dos aña pasa cu no a cumpli cu ne tampoco.
Awe 5 pa 12 kier drecha un situacion cu pa aña nan largo ta malo y dos aña a pasa no a percura di drecha esaki, pero awe cu ta bay tin eleccion e nervionan a coy curpa cu 5 pa 12 kier cuminsa campana kico ta nan meta y cu kier drecha AVB, sacando carta “contract of Agreed Objectives” algo cu sigur ta hopi laat y di lamenta. E realidad ta e bestuur actual no a traha y ta bisto cu nan no a drenta bestuur pa drecha situacion, dos aña a pasa pero pa biba lekker y awe despues di 2 aña kier pretende cu lo kier haci esaki di berdad y na unda cu dia y anochi ta yama y acerca clubnan cu e mes un intencion y e mes un campaña cu a wordo haci 2 aña pasa cu nan no a cumpli cu ne te dia di awe.
Clubnan ta cansa y club nan ta na altura di tur e situacion y con nan a wordo engaña pa varios tempo caba. Club nan a vocifera cu EA news cu nan kier un cambio y nan ta desea un aire fresco den mundo di futbol y principalmente un grupo di personanan innovativo, pero cu tampoco no tin ningun afan personal, pero cu amor pa deporte y cu ideanan di structura AVB completo pa duna forsa na clubnan por sigui crece y yuda cada hoben den nan propio bario.
Awe pa 7 or di anochi club nan ta decisivo y club nan a vocifera cu nan kier un cambio y cu nan merece di ta wordo trata miho. Ta e momento pa clubnan uni, paso union ta haci forsa pa un cambio real.
E voto cu cada club lo bay duna awe lo determina e caminda cu AVB lo sigui of nan kier sigui den e mes un wea cu nan ta of nan kier un aire fresco y positivo den mundo di futbol unda cu tin profesionalnan capacita pa dirigi AVB.
Awe nochi cada club bo voto ta conta y bo voto por haci un diferencia, esunnan cu realmente ta stima e deporte di futbol ta consciente y sa cu e voto ta pa mehoracion den su totalidad di AVB y no un club individual, nos ta un Aruba y ta un AVB pa deporte sano tin mester pa Aruba y su muchanan y hobennan.
1 comment
[…] Source link […]