ORANJESTAD,Aruba
Corte di Prome Instancia a duna un castigo cu ta hopi mas abou di loke tabata demanda di Fiscal y Ministerio Publico den e caso fatal cu a tuma luga dia 30 di mei ultimo na San Nicolas.E acusado Franklin Sanchez a kap Marlon Stennett na su rudia cu un machete, despues di a core su tras. Esaki a sosode despues cu su yiu muhe a informe cu Marlon y e tata a obligue na cierto actonan sexual, cometi door di e tata Stennett. Sanchez a pasa man cu machete y a bay en busca di Marlon, kende tabata amigo di su yiu muhe y cu el a permiti algo asina pasa.Den Corte, Hues a considera diferente aspecto na momento di yega na un sentencia. Na prome luga, a tene cuenta cu na momento di e sucedido Sanchez ta afecta emocionalmente pa loke a pasa cu su yiu muhe, pues no tabata actua rasonabel, no tabata su intecion pa mata e homber sino el a tira e machete na su pecho. Niun hende lo pensa cu un kap na pia por ta mortal, Corte a bisa den su sentencia. Pero lamentable ta cu den e caso aki, e kap a corta diferente ader cu a causa cu e homber di 24 aña a sangra muri. “Cu bo mannan bo a maltrata un hoben y a pone fin na su bida.”Rapport psychologico no ta mustra cu e no tin problema di cabes. Pa e sentencia a tene cuenta cu casonan similar na Aruba y den Reino. Pa esaki a conden’e na cinco aña di prizon. Tambe a bay di acuerdo cu e demanda di tata di e victima pa e paga e gastonan di entiero cu ta un poco mas cu 9 mil florin. E demanda inmaterial Corte a considera esaki un poco complica y a rechaza esaki, bisando cu e por cuminsa un caso civil si e ta desea esaki.
