ORANJESTAD,Aruba
Siman pasa, 30/7/’20, e articulo den Bondia ‘Ley di Naturaleza aplica inhustamente’ a hala mi atencion riba algun punto:
1) otro cu e autor di e articulo ta usa como argumento, e articulo 14 di SPAW NO ta referi na spearfishing como piscamento traditional – spearfishing den nos lama NO ta algo di, digamos, mas di 50 anya pasa; pues, no ta tradicional; seguramente spearfishing cu SCUBA ta algo relativamente recien.
2) Nan ta grita ‘foulplay’ pasobra e director cu sombre mes a bisa cu no tin data pa mustra cu cierto especienan den nos awanan ta corriendo peligro di extinction. Mi remarke: kisas NOS no tin data – pero organisacionnan internacional riba cual e director ta basa su prohibicion SI tin data ! Pues, si nan bisa cu e existencia di cierto especienan den Caribe a bay atras dramaticamente, esey por lo general ta conta pa nos awanan tambe !
3) Nan ta bisa cu “piscadornan ta kere cu por regula e asunto masha bon” – pero lamentablemente nan a menciona NINGUN regla ! Hey, menciona mi por lo menos cinco – cinco regla cu nos autoridadnan policial por controla facilmente.
Pa varios decada e idea tbt pa permiti, bow cierto condicionnan, spearfishing solamente PANORD di e isla.
Dialuna, 3/8/’20, dos articulo amplio den BonDia, esta “Bikker ta sigui pusha e practica (uso di harpun) a pesar di decision di Hoge Raad” y “Proposicion ‘gedoogbeleid’ pa uso di harpun a faya na 2005”, ta ofrece un bon vista di e trajecto hudicial di e lucha pa pone e leynan cu ta proteha nos naturaleza marino ‘temporalmente’ un banda. Manera nos tur sa, ‘temporalmente’ casi semper ta bira ‘eternamente’ den cualquier gobierno ……Comunicado di Sr. Adi Rasmijn