Riba Diamars 22 di Februari den cuadro di e “Aruba Calypso Heritage Week”, ta organisa un charla y actividad cultural na Scol di Arte San Nicolas. Dr. Gregory Richardson, Antropologo Cultural, investigador y educador unabes mas lo duna un charla interesante pa henter comunidad. E topico di su charla ta Simbolo, Tradicion y Ritual durante Carnaval y su nificacion. El lo enfoca entre otro riba Jouvert Morning, Carnaval en general y e actornan den e asina yama teatro di caya. Lo tin oportunidad amplio pa haci pregunta y intercambia cu e presentador.
Despues di e parti oficial, lo sigui den un atmosfera festivo cu un presentacion di nada otro cu The Boys, lidera pa Robby Philips riba e steelpan. The Boys ta conoci pa nan diversidad musical riba steelpan cu ta hopi amplio. Na specialidad naturalmente si ta Calypso y Soca.
Gregory Richardson ta e fundador di Calypso Week, cu ya caba ta den e di 6 edicion. E ta e autor di 3 buki y diferente articulo den revista scientifico. Su ultimo buki ta tocante musica di Calypso y Soca, yama “Sweet Breakaway, an Ethnographic study of Aruban Calypso Music and the One Happy Island Narrative”. E meta principal di e charlanan aki ta pa educa y intercambia cu e pueblo Arubano riba un topico tan stima bou di nos comunidad den un esfera ameno. Fecha: 22 di Feb 2022 : Scol di Arte San Nicolas Ora: 7:15 pm – 9.45 pm Idioma: Ingles y Papiamento.
Entrada: Gratis
