ORANJESTAD, Aruba
Tremendo y informativo; esey tawata e reacion di cada participante cu a participa na e charla di “Educacion Sexual” cual a wordo organisa pa Fundacion pa Nos Muchanan diasabra ultimo na ATIA.
Orador pa e mainta aki tawata Felishah Ponson y Janelle Artsen cual ta dos trahador pedagogico na Fundacion Pa Nos Muchanan. E trahador nan aki ta reconoci pa duna guia y conseho na mayornan y lidernan di centro pa loke ta trata e cuido y gui’a pa muchanan entre 0-12 aña. A dicidi di trata e topico di Educacion Sexual pa asina lidernan compronde kico esaki ta encera y pa por yuda y gui’a un muchanan cohuntamente cu nan mayornan den e processo di desaroyo aki.
Educacion Sexual ta enfoca riba e desaroyo di bo curpa mientras ‘Sexuele Voorlichting’ ta enfoca riba e acto di sex. Tur dos di e topiconan aki ta hopi important pa trata y hopi biaha na scolnan basico nan ta cuminsa haya e parti di ‘Sexuele Voorlichting’ ora e muchanan cuminsa madura. Lidernan di centro por cuminsa cu eduacacion Sexual den nan centro pa asina siña muchanan chikito con pa balora nan mes y nan curpa, con pa cuida nan mes, con pa yama nan partinan intimo dor di usa e palabra correcto y con pa bisa No! Tur esaki ta cosnan hopi importante cu mester pone atencion na dje pa asina e muchanan ta mas conciente di nan curpa y por splica ken y na unda un persona a mishi cune si un situacion asina presenta.
Lidernan di centro tambe a siña tocante fasenan di desaroyo pa loke ta trata sexualidad, con ta contesta cierto preguntanan di un mucha den fase di cambio. Como lider of educador, ta importante pa duna gui’a na muchanan cu ta curiouso riba tereno aki cohuntamente cu nan mayornan.
Janelle y Felishah tambe a añadi cu ta sumamente importante pa duna muchanan e informacion correcto y contesta nan preguntanan riba nan nivel di desaroryo pa asina nan no bai puntra un otro persona por ehempel un amigita/amigito y recibi e informacion incorrecto.
Finalmente nos por conlcui cu e charla Educacion Sexual pa muchanan entre 0-12 aña tawata informativo y interactivo caminda cu cada centro cu a participa na e charla a engrandece nan conocemento riba e tereno aki.
FPNM ta gradici su trahadornan pa nan dedicacion pa brinda un workshop exitoso una bes mas. Alabes FPNM ta felicita e lidernan, deseando nan exito cu e incorporacion di e informacion duna den nan centro!
