Camara di Comercio y Industria Aruba (KvK) a organisa su prome evento pa aña 2022 riba diabierna, 28 di januari ultimo. Manera ta custumber, na comienso di aña KvK ta organisa un evento caminda invitadonan, tanto di sector priva como tambe di sector publico, ta bini hunto pa socialisa y na mesun momento haci uzo di e oportunidad pa intercambia idea y opinion riba asuntonan cu ta andando y topiconan cu ta importante pa nos economia y Pais. Tambe por a combersa cu e miembronan di directiva di KvK cu tabata presente na e evento.
E Presidente saliente, sr. Omar Tromp, a expresa cu aña 2021 tabata un aña difícil pa nos sector comercial den cual ainda por a sinti e efectonan di e pandemia y cu apenas a cuminsa cu e proceso di recuperacion di nos economia. Varios stakeholders, incluyendo KvK, a wordo acerca pa atende cu e trayecto di ehecucion di e Landspakket. E Presidente nobo pa aña 2022, sra. Monica Kock, a vocifera cu e aña aki KvK lo continua di ta envolvi di cerca den e proceso aki. KvK lo mantene comunicacion estrecho cu e stakeholders y cu Gobierno di Aruba y ta desea di ta mas visibel pa comercio por keda na altura di e contribucion di KvK y e comerciantenan por duna nan aporte. Den e cuadro aki, a haci un yamada na e comerciantenan pa acerca KvK y duna nan feedback encuanto e retonan cu nan ta confrontando y nan preocupacionnan pa na su turno KvK evalua unda por duna asistencia y por trece e puntonan bao di atencion di Gobierno di Aruba.
Proximamente KvK, huntu cu algun stakeholders, lo desea di reuni cu Gobierno riba e intencion di introduci e sistema di impuesto nobo BTW entrante 1 di januari 2023. KvK ta di opinion cu lo mester evalua bon e scogencia pa introduci un sistema nobo en bes di actualisa e sistema actual di BBO. Alabes mester percura pa e transicion bay sin complicacion y pa comercio no wordo perhudica den e proceso.
KvK tambe tin algun reto individual su dilanti ya cu pa por cumpli cu e recomendacionnan di CFATF y conforme e ley di combati terorismo y labamento di placa, lo introduci un Registro di UBO (“Ultimate Beneficial Owner”). KvK lo mester percura pa e preparacionnan necesario pa loke ta trata set-up y administracion di e Registro, pa facilita nos comerciantenan cu nan obligacion di registra nan accionistanan/UBO. Ademas, e ley di e Registro Comercial (“Handelsregisterverordening”) ta anticua y lo wordo actualisa a corto plaso, pues KvK lo ta envolví tambe den e proceso aki.
KvK ta contento cu e Business Mixer tabata un exito y ta spera cu e aña aki KvK lo por organisa mas evento, reunionnan, training y charla pa comercio pa asina por ta mas cerca di e comerciantenan pa por haya nan feedback y asina tin un bista mas amplio di e retonan, preocupacionnan y deseonan cu ta reina den sector priva.
