Despues ku trabounan di drecha i renobá e pir na bich di Chachacha a finalisá a kontinuá mesora ku renobashon di e área di bishitante ku e meta pa hasi esaki mas atraktivo.
Resientemente a kuminsá ku e área di bishitante na Chachacha Bich ku e intenshon pa esaki bira mas aksesibel i mas bunita. A drecha entre otro e murayanan na e bich i duna esaki un kolo nobo. A pone palapanan nobo pa krea mas fresku i komfortabilidat pa bishitantenan di e laman. Tambe a pone algun mesa i banki di betòn pa asina por sinta i disfrutá na un manera mas kómodo di e bich. A mira ku ya algun di e trabounan hasí aki na e bich a keda apresiá. Por a nota un bich bon bishitá durante fin di simannan tras di lomba.
Entidat Públiko di Boneiru (EPB) kièr hasi un yamada na tur bishitante di e bich di Chachacha pa huntu nos kuida e fasilidatnan nobo na e laman. Sòru pa semper tene limpi i ruim òp ora ta bai kas. Teniendo nos espasio limpi nos ta sòru pa e área keda higiéniko i tambe na un bon estado pa e siguiente bishitante.
