For di 2010, Sint Maarten no a logra ningun aña stipula su presupuesto na tempo. E aña aki, e situacion ta mescos. Debi na esey, ta falta un marco pa por gasta fondonan y haci inversionnan nobo. P’esey, Cft ta urgi gobierno pa yega mas pronto posibel na un presupuesto stipula pa 2024.
Durante ningun di e añanan for di e reforma politico di 2010, Sint Maarten a logra stipula su presupuesto prome cu 15 di december di e aña presupuestario precedente. Cft tin un par di aña ta expresa su preocupacion tocante di e retraso structural cu tin den e entrega di e presupuesto stipula, pasobra e presupuesto ta forma e base pa e autorisacion pa gasta fondonan y haci e inversionnan necesario. Ta di sumo importancia pa Sint Maarten implementa e plannan di enfoke cu a elabora caba pa mehora e proceso presupuestario. Siguiendo e conseho di Cft, Conseho di Minister di Reino a pidi Sint Maarten pa stipula e presupuesto 2024 mas pronto posibel, pero en todo caso pa mas tarda riba 31 di mart 2024.
Cuido y fondonan social
Na final di 2022, e deficit cumulativo di e fondonan di cuido tawata ANG 274 miyon. Ta anticipa cu e deficit aki lo sigui crece e añanan venidero. Sint Maarten ta trahando riba reformanan pa baha e deficit. Den e marco aki, lo por enfoca riba prevencion i un desplasamento di e cuido i fondonan actual for di cuido secundario na cuido primario. Asina por evita cu den futuro, pashentnan mester di cuido secundario mas costoso. Reformanan ta crucial pa garantisa e pago di cuido y pa sigura e acceso na cuido. Cft repetidamente a expresa su preocupacionnan tocante di e implementacion debido di reformanan. E hecho cu ta pospone reformanan ta induci na un situacion insostenibel cu consecuencianan sumamente grandi pa e presupuesto di e pais.
Banda di esey, Cft tin preocupacion tocante di e previsionnan social, particularmente tocante di e pensioen di behes (AOV). Debi na e hecho cu e populacion ta enbehece cada bes mas, den e añanan venidero e cantidad di hende grandi cu derecho riba un pago di pensioen lo aumenta hopi. Ta anticipa cu na 2029, e ingresonan di prima lo no ta suficiente pa por cubri e pagonan di AOV. Cft ta conseha e gobierno pa tuma medida pa percura cu e previsionnan di behes ta keda pagabel.
Inversionnan
Na 2023, Sint Maarten a presupuesta ANG 90 miyon na inversion. Pa parti di esakinan, Sint Maarten a contrata un prestamo. Un parti considerabel di e inversionnan aki no a ser ehecuta na 2023, en cambio lo realisa nan e aña aki. Cft a pidi Sint Maarten pa tene e dato aki na cuenta na momento cu ta elabora e presupuesto pa 2024. Ademas, Cft a pidi Sint Maarten pa inclui un agenda di inversion multianual, pa asina por tene cuenta cu e fondonan y e capacidad di implementacion disponibel.