Cft: Awor ta cuestion di ehecucion

Gobierno di Corsou ta para dilanti di retonan grandi y e por probecha e recuperacion economico actual pa aplica mehoramento structural. Asina Colegio di supervision financiero di Corsou y Sint Maarten (Cft) a señala den combersacionnan reciente cu Gobierno di Corsou. Corsou mester limita su gastonan y aumenta su entradanan, tambe pa medio di un miho cobramento di impuesto. Pa evita un subida mas halto di debe, un ekilibrio den servicio ordinario ta necesario na 2023. Mester introduci diligentemente e reformanan necesario pa garantisa cuido y seguridad social pagabel. Na termino cortico mester evita contribucion adicional di Pais Corsou na seguridad social. Na termino mediano Corsou lo mester garantisa pagabilidad di e sistema social, tambe pa e futuro generacionnan.

Debe publico di Corsou ta monta actualmente na ANG 4.196 miyon. Corsou a cuminsa cu un proyecto di aumento di entrada (fiscal) cu e meta pa elimina e retraso den imposicion di debe fiscal (aanslag) y cobramento di e debenan fiscal pendiente. Esaki lo mester conduci na un aumento di cumplimento di impuesto di e contribuyentenan actual y na entrada mas halto. Pa evita un mayor aumento di debe publico, control di gasto tambe ta necesario. Pa logra esey mehoramento den e ciclo presupuestario y di hustificacion, den maneho financiero y den yenamento di e propiedad di accion di e entidadnan publico ta necesario.

Presupuesto di 2022

E proyecto di presupuesto di 2022 ta mustra un deficit di ANG 262 miyon den servicio ordinario. Gobierno por reduci e deficit aki limitando e gastonan ainda mas y aumentando e entradanan. Ademas di medida pa mehora cumplimento, tambe un reforma fiscal ta necesario, den cual ampliacion di e base impositivo den combinacion cu reduccion di e gastonan administrativo mester ta central. Den e proyecto di presupuesto cu aworaki ta na Parlamento a inclui pa 2022 tambe un dotacion na e fondo fluctuante cu lo no ta necesario mas. Al respecto Ministro di Finansa a priminti di bay presenta un nota di amienda pa e proyecto.

Servicio ordinario balansa den 2023

Pa evita un aumento nobo di e debenan, servicio ordinario lo mester ta balansa na 2023. Esey ta rekeri un control di gasto den tur e ministerionan. Pa e añanan posterior surplus lo ta necesario pa amortisa debe y cumpli tambe cu e reglanan di compensacion di deficit, manera ta stipula den e Ley di Reino di Supervision Financiero (Rft). Banda di esey adicionalmente lo mester haci palabracion tocante e prestamonan di likidez cu ta vence dia 1e. di april 2022. A palabra cu lo bolbe trata e tema aki den e di cuater reportahe di ehecucion di 2021, cual entre otro lo mester mustra cua lo ta e deficit real na 2021.

Inversion specifico ta necesario

Corsou tin di haber cu recesion economico di hopi aña y banda di esey e pandemia di Covid-19 a dal e duro. Den e di dos mita di 2021 un reactivacion economico ta evidentemente visibel, particularmente den e sector di hospitalidad y turismo. Segun e ultimo pronostico, economia di Corsou lo crece otro aña cu 6,2%. Ta di gran importancia pa maneho financiero di gobierno ta na ordo despues di e crisis y pa economia di Corsou sigui crece. Reforma economico, reforma fiscal y control di gasto ta crucial den tal caso.

Compara cu otro pais den Caribe, Corsou por saca bentaha, ehecutando e medidanan y e reformanan stipula den e pakete di medida pa Pais Corsou (landspakket). Tambe inversion specifico den e fase aki di e crisis lo contribui na esey. Lo mester bay wak con den e periodo nos dilanti lo por libera medionan pa esey, tambe den consulta cu Hulanda.

Riesgo den caso di economisa den cuido y seguridad social

Seguridad social y cuido ta un parti importante di e presupuesto di gobierno. Pais Corsou ta paga un contribucion anual di ANG 306 miyon na e fondonan social y mester compensa deficit den e fondo fluctuante. Gobierno a tuma decision pa medio di cualnan lo mester evita deficit den e fondo fluctuante na 2022 y 2023. E decisionnan ey ta rekeri ehecucion na tempo y monitoreo skerpi y lo mester desaroya nan pa nan bira reforma structural pa haci seguridad social y cuido sostenibel tambe na termino mas largo. Cft a expresa su preocupacion tocante ehecucion di e acuerdo cu lo compensa e gastonan di explotacion mas halto di Curaçao Medical Center, den comparacion cu Sehos, cu spaarmento door di eficiencia den cuido. Particularmente no ta realisa of ta realisa insuficientemente spaarmento den remedi. Cft a urgi pa tuma paso substancial den esey e aña aki mes ainda. Esey lo mester conduci finalmente na un contribucion nacional inferior di gobierno na e fondonan social.

Di 25 te cu 27 di october Cft a haci un bishita na Corsou y a hiba combersacion cu Gobernador, Ministro di Finansa, Ministro di Salud, Naturalesa y Medio Ambiente (GMN), Conseho di Ministro, Comision Financiero di Parlamento, Controlaria General di Corsou (ARC), Servicio di Impuesto y Banco di Seguro Social (SVB).