Den e añanan cu ta bin Corsou ta enfrenta aumento di gasto como consecuencia di e solucion pa ENNIA y di refinanciamento di e ayudo di likides. Ademas, e riesgonan y e inseguridadnan den cuido y seguridad social ta sigui ta grandi y Corsou ta enfrenta un reto grandi pa inversion. Colegio di supervision financiero di Corsou y Sint Maarten (Cft) a pidi atencion special pa e desaroyonan aki den su combersacion recien cu Gobierno di Corsou. Economia di e pais ta creciendo, danki na turismo entre otro. Por sigui reforsa e economia door di inversion bon defini. Cumplimento fiscal a mehora significantemente den e ultimo añanan, pero mester consolida esaki structuralmente. Mester preveni cu ta sigui aplasa introduccion di e sistema di permiso pa e sector di wega di placa. Ademas, reforma structural ta necesario pa salubridad y seguridad social por sigui ta accesibel pa e futuro generacionnan.
Recientemente, Gobierno di Corsou a opta pa un solucion pa e caso di ENNIA caminda e pais lo aporta cu fondo necesario pa un likidacion controla. Cft ta considera esey un solucion menos riscante cu un relansamento di ENNIA. Un fiansa considerabel, necesario pa relansamento lo a blokia e presupuesto di Corsou durante varios aña. Esey lo por a impedi inversionnan futuro. Awo Corsou, den cooperacion cu Banco Central di Corsou y Sint Maarten, lo sigui elabora riba e direccion di e solucion cu a scohe. Corsou a acorda cu Hulanda pa un prestamo pa refinanciamento di e ayudo di likides. E nivel di interes di e fiansa ta relaciona cu e solucion final pa ENNIA. Sigur ta cu e gastonan di interes di Corsou lo ta na un nivel structuralmente mas halto den e añanan cu ta bin.
Crecemento economico y aumento di cumplimento fiscal ta duna Corsou un base pa carga e gastonan creciente. Na aña 2022, e entradanan di belasting tawata riba 18 porciento mas compara cu aña 2021 y expectativa pa entrada di belasting pa aña 2023 tambe ta positivo. Mester mantene y amplia e nivel di entrada fiscal mayor aki. Pa aña 2024 ta importante pa berdaderamente realisa e entradanan presupuesta procedente di e sistema di permiso pa e sector di casino y wega di placa.
Cft a declara den varios ocasion cu Corsou mester inverti mas den su desaroyo economico. Ademas di miho resultado pa e habitantenan di Corsou, fortalecemento di economia ta contribui na resiliencia di finansa publico. A pesar di aumento di gasto, Corsou lo mester crea mas espacio den e presupuesto pa inversion. Esey lo por logra aplicando reforma structural. Corsou por probecha di e oportunidadnan cu e Pakete Nacional ta brinda pa esey.
Salubridad y seguridad social
Corsou ta paga for di presupuesto nacional un contribucion anual di ANG 305 miyon na e fondonan social. Pa evita deficit di e fondonan social den 2022 y 2023, e pais a implementa algun medida pa controla exitosamente. No obstante, Banco di Seguridad Social ta sigui spera deficit structural den e fondonan social (fondo fluctuante). Corsou ta obliga pa absorba e deficitnan aki cu fondo di presupuesto nacional. Esey ta a costo di otro gasto publico, por ehempel inversion y educacion. Mester aplica reforma structural pa salubridad y seguridad social por sigui ta accesibel pa futuro generacionnan. E situacion financiero di Centro Medico di Corsou ta sigui ta preocupante. Cft a pidi Curaçao pa trata e situacion aki cu mas urgencia.
