Ta move di scenario cu grado di recuperacion di 45% pa uno di 55%, ora cera 2021! Actualmente e expectativanan por lo general ta hopi positivo pa loke ta trata e cifranan di turismo pa loke ta turismo ‘stay-over’.
Pa 2021 a formula tres scenario den e espectativa pa loke ta trata posibel resultado pa e aña aki compara cu aña 2019, e ultimo aña normal pa nos turismo. E prome scenario ta esun mas ‘conservativo’ unda Aruba su turismo lo recupera cu 45% – esun memei ta esun ‘cautelosamente optimista’ na unda nos lo recupera cu 55% y esun miho ta esun ‘optimista’ unda nos lo recupera 60% di nos turismo compara cu loke nos a ricibi na 2019.
UNDA NOS TA AWO?
E prome kwartaal nos ta wak cu e resultado tawata abao pa loke a wordo proyecta pa cada luna di januari y februari pero pa maart nos por mira un adelanto unda nos a yega e scenario conservativo, cu un total di 48,967 turista. En total a cera e prome kwartaal cu un total di 112,317 turista. Pa april ta proyecta cu nos destinacion lo por ta yamando bonbini na mas cu 50 mil bishitante y cada luna den kwartaal dos ta indica cu e resultado por ta ariba di loke a wordo proyecta den e tres scenarionan cu ta incluso esun di optimista. Pues esaki ta loke e proyeccionnan ta duna nos te awo, pero corda cu debi na e situacion cu ta cambia frecuente, esaki tambe por cambia. E proyeccionnan aki ta wordo mara na e cantidad di asientonan aereo y grado di occupacion pero mas cu claro tambe di e feedback di aerolineanan, hotel y operadornan cu ta bende Aruba. Segun e proyeccion awo, e di dos kwartaal di 2021 por duna nos destinacion te cu 42% mas bishitante compara di loke nos a wak den kwartaal uno. Esaki ta pone cu nos ta spera pa e aña aki di por bay di e expectativa di e scenario ‘conservativo’, pa e scenario di ‘cautelosamente optimista’. Y esey kiermen cu nos por ta cerando e aña 2021 posibelmente cu e grado di recuperacion di 55% compara cu loke nos a ricibi na bishitantenan na aña 2019. Claro cu factornan por fluctua y lo sigui monitorea e situacion di cerca.
CADA PAIS TIN SU RESTRICCIONNAN
Nos a reinicia e trayecto di recuperacion na luna di maart 2021, cu desde re-apertura di nos turismo a bira pues e luna cu un resultado mas fuerte. Nos tur por nota cu e cantidad di bishitantenan pa nos isla a aumenta.
E retonan ta keda cu e otro mercadonan –cu no ta Merca- manera Latino America unda ainda tin hopi restriccion pa biaha. Pues e ta un proceso cu ta tuma mas tempo pa recupera incluso nos ta cera tambe pa e mercado di Brasil. Pa loke ta trata e mercado Europeo por mira diferente reto existente: pa loke ta e dos mercadonan principal for di e continente aki cu ta Hulanda y Inglatera. Pa Hulanda tin un conseho pa no efectua ningun biahe internacional si e no ta pa motibo escencial y esaki te cu 15 di mei 2021. Ainda no ta conoci si e conseho di biaha conforme e maneho Hulandes lo cambia for di 16 di mei padilanti. Pa e mercado Ingles te cu 17 di mei tin e mesun conseho y no ta conoci ainda si ta suavisa e restriccionnan pa biahenan internacional entrante 17 di mei padilanti. Pa e mercado Canades ta mescos – un maneho hopi stricto pa biahenan internacional. Sunwing – Westjet y Air Canada ta e tres aerolineanan cu ta sirbi Aruba non-stop for di Canada y pa awo no tin vuelonan den lunanan di verano. Ta importante pa menciona cu cada pais tin su propio restriccion y maneho pa biahe y esey ta mara na e situacion local di cada pais.
BISHITANTE MESTER SIGUI E REGLANAN STIPULA & TA SIGUI ENFOCA RIBA E VACUNA COMO OPORTUNIDAD
Aruba Tourism Authority ta sigui traha riba oportunidadnan y un di nan ta e vacuna – esey ta sin duda un oportunidad grandi pa nos destinacion. CDC na Merca (ekivalente na e organisacion DVG na Aruba) recien a lansa un guia pa esnan cu a vacuna y cu kier efectua un biahe. E ta inclui diferente tips y reglanan pa esnan cu a vacuna caba, unda no mester haci ningun test si nan ta biaha dentro di nan propio pais/ biahenan domestico na Merca. Pa Aruba y paisnan internacional ta bisa cu mester sigui e reglanan stipula di entrada pa cada pais.
Pa tur esnan cu ta drenta Merca ainda ta sigui ta vigente cu mester presenta un test negativo di Covid, no obstante e biahero ta vacuna! Pa Aruba, actualmente ta trahando riba e maneho di kico lo ta e rekisitonan di entrada pa esnan cu a vacuna. Te awo –no obstante cu bo a vacuna- e mesun reglanan ta vigente pa tur hende. Dus bo mester presenta resultado di un test negativo aunke cu bo ta un turista cu a vacuna caba, of un local cu a vacuna caba y ta drenta bek Aruba. Si bo compara e maneho di Merca compara cu esun di Aruba por mira cu esaki ta mescos ora di entrada; es decir Aruba y Merca ta exigi resultado di test negativo, incluso pa esnan cu ta vacuna. Dus Mericanonan mes, aunke cu nan a vacuna – si nan bin di exterior y bolbe drenta Merca – nan mester haci e test y presenta un resultado negativo prome cu nan bolbe drenta nan propio pais bek. Pues nada a cambia pa e turista Mericano – mester test prome cu drenta Aruba y ora e bolbe su pais bek mester presenta un test cu resultado negativo.
Nos mesun maneho di accepta vacunacion como forma di drenta Aruba ta hopi mara na e grado di proteccion di nos mesun populacion. Nos kier sigura cu mas hende ta proteha y pues vacuna prome cu bay suavisa e maneho di entrada.
Corda cu e bienestar di nos cada un ciudadano y nos bishitantenan, ta importante y teniendo nos mes na protocolnan estableci, ta contribui na recuperacion mas lihe di nos economia.
