Durante e reunion, tur organisacion a comparti nan progreso y a discuti desaroyonan nobo pa e siguiente lunanan. Di e 11 Centronan di Bario na Aruba, 9 tabata presente cu un energia sumamente positivo na Centro di Bario Noord.
Na cuminsamento di e reunion, e directiva di Centro di Bario Noord a presenta nan mes y nan historia impresionante, manera nan infrastructura solido di baseball cu 12 team, un centro di cuido pa mucha, grupo di adulto mayor, un grupo di 25 hoben “youth Power” y naturalmente nan celebración di eventonan cultural y nan famoso carnaval di Noord. Despues, varios Centronan di Bario a presenta nan ‘programmaleider’ nobo, kende awor ta responsabel pa crea actividadnan nobo pa diferente grupo specifico den nan centro. E Centronan di Bario cu un awor tin e sostén di un ‘programmaleider’ ta: Noord, Lago Heights, Savaneta y Santa Cruz. Tres otro Centro ta finalisando e ultimo detayenan pa asina nan por selecta nan ‘programmaleider’ den corto plazo.
Team di CEDE ARUBA tambe a duna diferente updates. Centronan di bario presente a ricibi información cu tin interés di un fondo nobo di Hulanda cu lo ta dispuesto pa inverti den iniciativa di bario y tambe den proyectonan pa comunidad. Pronto lo anuncia esaki oficialmente. Tambe a wordo informa cu tin varios fondo Hulandes nobo cu ta interesa pa inverti den actividad social-cultural pa hoben y mas gruponan specifico. E Centronan di Bario a bay di acuerdo pa colabora enconhunto, pa asina por haci nan peticion pa financiamento di nan proyectonan den un solo blok na e fondonan Hulandes. CEDE ARUBA tambe a anuncia e próximo etapa pa e proyecto PITCH TIME unda ta inclui lidernan hoben den e Centronan di Bario. Aki varios Centro a bay di acuerdo pa colabora den e programa PITCH TIME, cual lo cuminsa den e próximo lunanan. Lo sigi duna información na e centronan cu a mustra interés den transcurso di otro siman. Otro proyecto pa Barionan Único ta un unidad mobil (van) pa trese movecion atrabes di deporte, wega y otro actividadnan den diferente bario, esaki lo wordo haci encolaboracion cu IBISA. CEDE Aruba lo informa ora cu esaki wordo concretisa formalmente y lo avisa na e comunidad tur e detayenan.
Tocante BARIONAN UNICO: e programa BARIONAN UNICO a cuminsa na januari 2023, a base di un acuerdo mutuo entre Gobierno di Aruba, CEDE ARUBA y tur 11 Centronan di Bario. Den e acuerdo aki, Gobierno a aumenta e financiamento structural di tur Centronan di Bario. Gobierno, Centronan di Bario a firma e acuerdo aki, unda cu CEDE Aruba lo ta esun encarga pa maneha e fondonan aki y mester brinda sosten adicional na e centronan. CEDE ARUBA ta encarga cu entre otro e parti di recurso humano, administracion, aplicacion pa fondo y contabilidad. CEDE ARUBA a haci inversionnan interno pa asina crea un team nobo pa ehecuta e bunita proyecto aki. Realidad ta cu e acuerdo aki, awor tin brinda mas oportunidad pa ricibi financiamento internacional.
Samenwerkende Fondsen Cariben tambe ta comprometi den e programa aki. Ta di remarka e alegría di e miembronan di directiva di e Centronan di Bario presente, cu a comenta cu nan ta hopi positivo pa mira un bon inicio di e proyecto aki cu pa anjanan nan tabata boga pe.
CEDE ARUBA y tur Centronan di Bario presente ta wak cu entusiasmo pa un continuacion di e programa BARIONAN UNICO. E programa aki lo fortifica e Centronan di Bario, y lo ofrece oportunidadnan nobo na nos hubentud y nos comunidad en general.
1 comment
[…] Source link […]