ORANJESTAD,Aruba
Tur cos ta practimente cla pa lansa di dos edicion di Pitch Time Aruba 2020.
Un iniciativa di CEDE Aruba cu ta trece den forma inovativo un programa y competencia PITCH TIME, pa hobennan cu kier bira boluntario of forma parti di un organisacion social unda por haci impacto na Aruba. E programa PITCH TIME ta ricibi sosten financiero di comerciantenan cu ta cla pa aporta awg 15.000 na desaroyo di nos hobennan y tambe duna bek na comunidad social por medio di un projecto cu ta wordo presenta pa un fundacion/ instancia.
CEDE Aruba kier crea un coneccion entre hobennan, organisacion social y companianan local. E programa PITCH TIME ta crea un manera nobo pa hoben por participa y siña abilidadnan ariba tereno di proyecto social. Aña pasa tabata tin un total di 140 hoben cu a participa den e Proyecto aki y cu a Sali cu e gana pa sigi yuda e fundacion cu nan a aporta na dje. E aña aki hobennan ta cla caba pa cuminsa y ta spera cu tur Proyecto wordo manda aden.
Den luna di januari 2019, varios fundacion a presenta un proyecto of idea pa cu lo mester haci un impacto positivo riba e gruponan vulnerable den nos comunidad. Awor ta e oportunidad pa fundacionnan cuminsa prepara nan Proyecto cu mester wordo manda den e proximo simannan pa CEDE Aruba.
E programa ta tuma lugar den e periodo di Maart te October 2020 y ta consisti di diferente fase.
E 15 mihor proyecto of idea lo wordo selecta den luna di Maart 2020 pa drenta den e competencia di PITCH TIME. Cada fundacion cu drenta den e competencia lo traha hunto cu un youth coach y lo mester recruta un team di minimo 5 y maximo 10 hoben cu mester ta envolvi den e proyecto. Na final di meu lo organisa e PITCH TIME ACADEMY, na unda hoben lo ricibi curso tocante entrepreneurship, public speaking, project management, team building y con pa duna un pitch. Asina nan lo prepara nan PITCH pa e proyecto.
Den Juli 2020, durante e PITCH TIME EVENT, tur fundacion y nan team di hoben boluntario lo mester PITCH nan proyecto dilanti e sponsors. Na final di e PITCH TIME EVENT, e sponsors lo escohe pa nan proyecto, cada un cu un balor averahe di AWG. 15.000,-. 10 proyecto por haya financiamento. E teamnan cu a gana lo bai den e ehecucion di e proyecto y lo presenta nan resultado na October 17, 2020 durante e PITCH TIME SHOWCASE, unda esaki lo bira un anochi bunita cu testimonio di NGO’s, hobennan y companianan. E famia di e hobennan y tur fundacion y sponsors ta invita pa celebra e gran final di PITCH TIME.
CEDE Aruba ta gradici TeleAruba pa forma parti di PITCH TIME mirando cu henter e proceso lo bira un TV Show. Si tin hoben y/of companianan interesa pa participa, por tuma contacto cu CEDE Aruba na 582-7666 of cedearuba@setarnet.aw Pa mas informacion, por bishita y bishita nos ariba facebook na PITCH TIME ARUBA.
