Na cuminsamento di 2023 CEDE ARUBA a aserca stichting Jantje Beton di Hulanda pa asina sondea e posiblidad pa haci un speelscan pa Aruba. Un idea cu a origina dor di e programa nobo di CEDE ARUBA, Barionan UNiCO.
Durante e bishita di stichting Jantje Beton a pasa mira 40 diferente lugar unda tin speeltuin of lugarnan di recreacion pa mucha y hoben. A base di e resultadonan ricibi, a nota cu hopi speeltuin no tabata den bon condicion y cu esaki ta haci nan peligroso pa mucha por haci uso di nan. E dos representantenan tambe a combersa cu casi 100 hoben durante nan estadia na Aruba, pa asina siña mas kico e muchanan ta desea of kico nan lo kier pa wordo mehora. Nan a drenta bario, scolnan y organisacionan pa por a colecciona informacionan necesario.
E representantenan di Jantje Beton a dialoga cu diferente instancia na Aruba y despues di a haci un analisis a manda nan recomendacion cual entre otro tabata e idea pa cuminsa cu un speelbus.
Despues di algun siman CEDE ARUBA ricibi e rapport oficial di stichting Jantje Beton di Hulanda y aki a consehonan tabata cla cu lo mester actua pa cumpli cu e necesidad cu nos muchanan tabata desea. E desea mas menciona tabata pa nan por tin un espacio cu nan por move y recrea cu ta brinda un seguridad y cu ta serca di nan cas mes.
Na Hulanda ta hacienda uso di e metodo aki, unda cu un speelbus ta pasa pa un paar di ora den barionan y cu bon resultado. CEDE ARUBA a mira esaki den e idea aki un bon posibilidad pa cuminsa cu movecionan den bario pa mucha y hoben, mientras ta busca solucion pa renobacion of reconstruccion di speeltuinnan cu nos tin caba den barionan.
Mirando cu lo mester di sumanan grandi pa reconstrui of renoba facilidadnan cu tey caba y cu e lo por dura den planificacion y ehecucion, CEDE ARUBA a tuma e reto di bay sondea e posibilidad pa cumpra un mini- bus of cargo van pa asina comberti e auto aki den un speelauto.
CEDE ARUBA a tuma contacto cu IBiSA pa hunto ehecuta e deseo di nos muchanan. IBiSA su instructornan lo eherce e tarea aki, mientras CEDE ARUBA lo busca material pa e bus.
IBiSA lo ta encarga pa hinca un programa y e structura den otro. Mirando cu esaki lo ta un proyecto piloto y cu mester di mas partners pa por completa henter e plan aki, CEDE ARUBA a aserca FCCA.
CEDE ARUBA ta hopi contento pa anuncia cu awor nan ta conta cu IBiSA y FCCA pa e Proyecto piloto aki. Plananan ta pa cuminsa den luna di October 2023 cu e WAW Mobiel den bario.
Durante BAN CAYA 2023 cu a tuma lugar diadomingo 10 di September a inaugura e WAW Mobiel.