Riba celebracion di dia di Rey, CEDE ARUBA cu proyecto comunitario
BARIO UNICO a organisa e prome BAN CAYA 2024 den San Nicolaas. For
di merdia caba tin famianan a cuminsa yega pa e evento pero a scucha
cu tabata mas atardi lo cuminsa. Esaki caba tabata duna e bista di e
necesidad pa famianan ta hunto den un celebracion asina.
Pa 4 or a cuminsa cu e diferente actividadnan y informacionan cu a
wordo ofreci dor di e instancianan (NGOS) cu a forma parti di BAN
CAYA.
E multitud a sa di disfruta di boxing, hotwheels, street basketball,
skateboard, rollerblades, dam, volleyball, y RYGF (Reach Your Goal
Foundation) cu un tremendo idea pa pone weganan popular enbibo
riba caya. Tambe tawata tin Competencia di baseball dunando hopi
mucha un oportunidad di hunga den ekipo. Banda di deporte,
bishitantenan por a ricibi lesnan di percussion, informacion di EHBO, y
informacionan di diferente instancianan cu ta yuda hoben y famia.
Tabata tin arte, cultura, bendemento di materialnan dor di nos
muchanan via Rode kruis, weganan di WAW mobiel hunto cu
instructornan di IBiSA y hopi cuminda y ambiente. Loke tambe a resalta
durante di e atardi aki ta e forma cu a sera conoci cu e diferente
nacionalidadnan cu ta integra nan cultura den San Nicolas. E
integracion di nos muchanan cu tin discapacidad mental of fisico cu a
participa durante e presentacionan.
Un union bunita cu a haci e atardi aki uno special. Centro di Bario Brazil
y Centro di Bario Lago Heights ta tin nan informacionan di tur locual e
centro tin pa ofrece na e comunidad di pariba di brug. Un danki sigur na
tur instancia cu tabata tey, IBISA cu ta partner di Bario Unico pa e
proyecto aki y tur boluntario cu a yuda durante preparacion y
ehecucion di e Proyecto aki. Un danki na nos sponsorsnan. CEDE ARUBA
ta anuncia di biaha e siguiente BAN CAYA cu ta den juli den e bario di
DAKOTA.
