ORANJESTAD,Aruba
Diadomingo 19 di Januari, den presencia di Minister President sra Evelyne Wever Croes, CEDE Aruba su team a duna reconocimento na 97 boluntario cu a traha activamente na un of otro instancia of organisacion den nos comunidad. Cada organisacion a ricibi e oportunidad pa reconoce un boluntario special cu a destaca durante aña 2019.
Un anochi hopi bunita unda cu cada organisacion of fundacion a entrega nan nominado un bunita plakaat como reconocimento pa nan trabou cu nan a desplega cu amor durante henter aña. Un bunita recuerdo cu a wordo traha cu material di plastic y glas cu a wordo colecta rond di nos isla y presenta den un forma di curazon. Cu e celebracion aki CEDE Aruba lo gradici tur ‘boluntario di aña’ cu a destaca pa nan organisacion durante 2019. Durante e ultimo añanan por mira cu e projecto VOTY Award a wordo accepta den comunidad y a crece pa casi 100 boluntario.
Prome Minister sra Evelyn Wever Croes a hiba palabra na cuminsamento di e programa y a duna su satisfaccion pa e programa aki. Min. Pres.; “ Trabou boluntario ta algo impagabel. Sin boluntario, tur nos organisacion social, clubnan di deporte, scolnan, centronan di cuido y organisacion pa hoben no por funciona. Pesey Gobierno di Aruba tambe ta apoya e VOTY Award pa duna e mensahe cu trabou Voluntario ta essencial y cu e mester wordo reconoce.”
Minister president tambe a bisa cu CEDE Aruba ta un organisacion dinamico den veld cu ta logra yuda organisacionnan pa desaroya proyectonan cu ta sostenibel. Ehempelnan ta entre otro, Tienermoederhuis di Stichting Casa Cuna Progreso, ampliacion di Stichting Ambiente Feliz cu un afdeling pa mucha y hoben cu desabilidad y e proyecto Signs of Safety hunto cu Bureau Sostenemi, Wit Gele Kruis y Departamento di Asunto Social.
CEDE Aruba a gradici tur organisacion cu a participa pa nan confianca. Sr. Daniel Tecklenborg, director di CEDE Aruba, a menciona cu CEDE Aruba lo keda traha duru pa stimula trabou boluntario den nos comunidad. Pabien na tur boluntario y nan organisacionan. Tambe un gradicimento na tur cu a presenta of a yuda pa haci e anochi uno special.
Ariba tereno di trabou boluntario, CEDE Aruba ta conoci como motor tras di Aruba DOET, e accion boluntario mas grandi di Aruba, pero tambe e programa pa hoben boluntario PITCH TIME y e trabounan cu ta wordo hasi cu fondonan di union Europeo, na unda hobennan di Aruba por participa den proyectonan boluntario na Europa.
