Drs. Richard Doornbosch, presidente di Centrale Bank van Curaçao
en Sint Maarten (CBCS) i su kolega di De Nederlandsche Bank (DNB), Prof. Dr. Klaas Knot, a
firma un karta di intenshon na Amsterdam pa ampliashon di kooperashon entre e dos bankonan
sentral. E karta di intenshon ta basá riba e ‘Memorandum of Understanding (MoU) between the Central
Banks of the Kingdom of The Netherlands and the Autoriteit Financiële Markten’. Meta di e MoU akí ta di
fortalesé kooperashon entre e dos entidatnan, entre otro den forma di interkambio di informashon i
asuntunan operashonal i asistensia tékniko.
Ku firmamentu di e karta di intenshon akí, CBCS i DNB a kumbiní ku nan lo konsultá ku otro a lo
ménos dos biaha pa aña riba tereno di kooperashon tékniko. E intenshon ta pa e presidentenan mes
hiba e deliberashon a lo ménos un biaha pa aña. Tur dos banko sentral ke logra fortalesé nan
kolaborashon na nivel operashonal i tékniko i lo hasi palabrashon spesífiko ku otro al respekto.
Ademas, CBCS i DNB ke ofresé e posibilidat pa miembro di personal por pasa (parti di) nan
programa di desaroyo trahando serka e otro partido i pa koleganan di CBCS por partisipá na e
kursonan ku DNB Academie ta ofresé.
E intenshon di kooperashon firmá awe lo keda re-evaluá kada dos aña. E promé evaluashon lo tuma
lugá un aña despues ku a firm’é, esta, na desèmber di 2021.
