Probablemente intervencion di Polis a pone cu hopi hende ta biba den un susto. A scapa futuro victimanan, pero esnan cu a cay den nan gara ta den susto y esnan cu lo por a bira victima di nan extorsion tambe ta den susto pasobra nan nomber por aparece cualkier momento.
Siman pasa Polis di forma sorpresivo a tira inval na tres adres y a detene en total 4 persona. Tur tin di haber cu sexting cu despues a conduci na soborno y labamento di placa.
Loke cu por a compronde ta cu personanan conoci y di bon reputacion a cay den e trampa aki poni door di e grupo di persona, di Aruba como di exterior.
E ta algo ta cu hopi hende sa haci, sin mira e peligro grandi cu esaki ta trece cu ne. Hopi biaha hendenan local ta haya mensahe via di nan Facebook, o sea messenger na Spaño y tin biaha na Ingles. E ta cuminsa den forma di basilamento y cada biaha e tono ta subi un tiki mas te ora cu ta bay den tentacion di haci sex via telefon of via mensahe.
Esnan cu ta cay den e trampa aki ta lubida completamente den protege nan mes di tipo di cosnan asina, pasobra ta cay den tentacion sexual y ta finalisa, sin conoce e otro persona na banda, y ta manda potret of filmacion. Aki ta unda cu e malhechornan a haya nan victima pa chantagea nan pa publica nan potret of filmacion, si no paga nan un balente suma di placa. Di e forma aki aparentemente hopi Arubiano cay.
Awo den e investigacion andando tin hasta un politico di partido MAS deteni. Ta trata di un persona masha conoci y kende durante e ultimo eleccion tabata riba lista di partido MAS lidera pa Marisol Lopez Tromp. Detencion di e homber aki a laga hopi hende boca habri. No sa e rol specifico cu e tin den e investigacion andando, pero e hecho cu a detene ta un indicacion caba cu e mester tin algo di haber.
For di seno di husticia mes no ta duna mas informacion, pasobra e caso ta bou investigacio. Loke ta bay pasa awo cu autoridadnan pa duna nan caso peso, lo busca tur hende kende nan nomber ta aparece den lista cu confisca pa haya mas prueba.
Un conseho ta no chat cu personanan desconoci, pio di otro pais, via di messenger. Ta conoci cu via di Messenger mayoria di soborno, hacking y otro tipo di delitonan ta wordo cometi.
