ORANJESTAD, Aruba
Ora hopi hende ta biba hunto y ta comparti espacio cu otro manera ta e situacion den un cas di cuido, virusnan por plama hopi lihe y pasa di un persona pa otro. Mirando cu mundialmente e casonan di COVID-19 ta sigui crese, Seccion Cuido di Nos Grandinan di Departamento di Salud Publico ta desea pa e casnan di cuido ta bon informa y prepara pa por trata cu casonan di malesa infeccioso cu por ta relata na malesa respiratorio manera influenza of corona virus cu por ta mortal.
Seccion di Malesanan Infeccioso y seccion di Epidemiologie y investigacion ta vigilando di serca tur desaroyo rond di COVID-19. Mundialmente e virus a afecta mas di 45.000 mil hende y a causa morto di alrededor di 1115 persona. Mester remarca cu e virus respiratorio aki ta pasa di hende pa hende atravez di particulanan cu ta keda den aire of riba superficie despues cu un persona malo cu sintoma di griep tosa of nister.
Recientemente World Health Organization a declara COVID-19 un “Public Health Emergencies of International Concern” di e manera aki elevando e precupacion internacional. Esaki ta e motibo tambe pa nos casnan di cuido na Aruba cuminsa revisa y/of cuminsa traha riba nan plan interno pa cu prevencion y contenimiento di malesa infeccioso manera COVID-19. Tambe seccion cuido di nos grandinan ta recomenda trahadornan di casnan di cuido pa busca mas informacion riba e topico aki y si nan mester guia y sosten por tuma contacto cu seccion cuido di nos grandinan na Departamento di Salud Publico.
Pakico un plan asina ta hopi importante pa nos casnan di cuido?
- Virus contagioso por sobrevivi ariba un persona su cuero, den medio ambiente y tambe riba superficienan cu ta wordo comparti
- Residentenan riba 60 aña ta cay bou di e grupo vulnerable pa desaroya complicacion serio.
- Apesar cu e residente no ta bandona e cas di cuido e ta bin den contacto cu empleadonan, otro residentenan, bishitante y e medio ambiente.
E falta di un control standariza di e empleadonan pa tuma precausion di infeccion tambe por causa cu un virus ta plama. Ta importante pa uza guante
- y otro equiponan di proteccion pa asina preveni cu virus y bacteria ta sigui plama .
- E falta di e proceso di communicaccion, informando e otro residentenan, miembronan di famia y bishitantenan cu tin un malesa contagioso, por baha e cantidad di infeccion cu ta/por plama.
- Falta di trahadornan y falta di fondo den cas di cuido ta keda un topico alarmante y un di e causanan pa mayoria complicacion den e residentenan.
E razon mas comun cu infeccionnan por wordo plama ta pa motibo cu trahadornan no ta pone atencion na medida nan preventivo, manera laba man of steriliza equipo prome cu duna cuido na un residente.
Pma medio di e comunicado aki, Departamento di Salud Publico, Seccion Cuido di Nos Grandinan ta urgi tur cas di cuido pa traha un plan strategico con pa preveni, combati y contene virus/malesa contagioso den nan casnan di cuido.
Pa mas informacion tocante Seccion Cuido di Nos Grandinan por tuma contacto na:
Tel: 522-4345 of manda nos un mail na ouderenzorg@despa.gov.aw
