ORANJESTAD, Aruba
Den nos comunidad cada biaha e pregunta curioso ta wordo haci si ora un pareha bai casa si e ta sosode ‘binnen gemeenschap van goederen’. Na prome lugar e termino huridico corecto na Hulandes ta ‘algehele gemeenschap van goederen’. Na papiamento nos lo traduci e termino huridico aki den ‘comunidad di bienes’. Den e edicion aki nos lo splica kico esaki ta nifica y e consecuencianan legal cu ta bini cune.
Antes bo tabata casa automaticamente den comunidad di bienes completo na Hulanda, al menos cu bo a traha condicionnan matrimonial cu ta dicidi otro. Desde 1 di januari di 2018 a wordo establece den ley di Hulanda cu na momento cu bo casa, bo ta casa automaticamente den un ‘beperkte gemeenschap van goederen’, cu otro palabra den un comunidad di bienes limita. Esaki ta encera cu tur bo pertenencianan personal y tambe deudanan cu abo tin antes di casamento, ta keda di bo personal. E pertenencianan y tambe deudanan cu bo obtene durante e matrimonio si ta bira di bo y bo pareha hunto. Pero con e situacion ta na Aruba? Akinan tambe bo ta casa automaticamente den un comunidad di bienes limita of juist un comunidad di bienes completo?
Situacion na Aruba
Art. 1:93 di nos Codigo Civil ta indica cu na e momento di ehecucion di e matrimonio un pareha ta casa automaticamente den comunidad di bienes completo si acaso e pareha no a sera un acuerdo tocante por ehempel cu nan bienes ta keda separa. Cu otro palabra comunidad di bienes ta nifica cu e propiedad y debe cu boso tawatin lo converti di ambos.
Kico ta cai bou di e comunidad di bienes?
Bou di comunidad di bienes ta cai tanto pertenencianan y carga financiero. Art. 1:94 inciso 1 ta stipula cu tur pertenencia actual y pertenencianan cu lo wordo obteni den futuro ta cai den e comunidad di bienes. E unico excepcion ta bienes cu ta deriva for di un testament of ora ta trata di un regalo di un persona cu a stipula cu e no ta cai bou di e comunidad di bienes.
Ehempel: Si abo como yiu hereda algo di bo mayornan, nan mester indica den un testament cu loke bo hereda ta cai pafo di e comunidad di bienes, si acaso nan no indica esaki, loke abo hereda lo cai den comunidad di bienes y por lo tanto ta bira dibo pareha tambe.
Gastonan financiero tambe ta wordo comparti ora cu casa bou di e comunidad di bienes. Inciso dos di art. 1:94 ta indica cu bou di carganan financiero ta cai tur e debenan di cada un.
Ehempel: Piet a studia na Universidad di Aruba. Durante su estudio Piet a haci un studielening. Cinco aña despues Piet a conoce Boo y nan a casa den comunidad di bienes. Esaki ta nifica cu hasta e lening/debe cu Piet a haci 5 aña pasa tambe ta cai den e comunidad di bienes. Es decir, e debe aki ta bira debe di su casa tambe.
E ta mas cu claro pa sa bon cu ken bo ta casa mirando cu na momento di drenta enlace matrimonial den comunidad di bienes bo no ta comparti solamente e pertenencianan, sino tambe e debenan acumula antes y durante di e matrimonio y cada ken ta responsabel pa mita di esaki, art. 1:100 di nos Codigo Civil.
Pensioen di biehes
Den e hurisprudencia yama Boon van Loon arrest, hues a dicta cu pensioen di biehes tambe ta cai den comunidad di bienes. E motibo di e uitspraak aki ta paso cu antes den mayoria caso e pensioen no tabata wordo comparti. Esaki tabata tin consecuencianan severo na momento di un divorcio pa e hende muhe, mirando cu antes den mayoria caso e homber tabata traha y acumula pensioen, mientras cu e hende muhe tabata haci trabou di cas y no tabata acumula pensioen. Esaki tabata nifica cu despues di un divorcio e hende muhe tabata keda sin entrada algun na momento di yega e edad di pensioen.
Pa es motibo hues a dicidi cu despues di 27 di november di aña 1981 cu pensioen di biehes tambe ta cai den comunidad di bienes.
Actualmente bo por opta pa no comparti bo pensioen. Esaki bo por indica den un acuerdo di condicionnan matrimonial (huwelijkse voorwaarden) of un echtscheidingsconvenant (acuerdo di divorcio). Den e acuerdo bo ta indica cu bo no ta desea di ricibi e pensioen di e otro, cu otro palabra, bo ta renuncia na bo derecho di haya pensioen di bo pareha/ex-pareha.
Condicionnan matrimonial
Un pareha cu no kier comparti bienes, es decir pertenencianan y carganan financiero di otro por dicidi pa casa pero bou stipulacion di condicionnan matrimonial. Por ehempel un pareha por dicidi cu cada ken ta keda cu loke nan tin of por yega na un cierto afspraak den un contract. Den e contract por wordo stipula por ehempel cu lo bai drenta enlace matrimonial pero pafo di comunidad di bienes, nificando cu cada ken ta keda cu nan propiedad, pertenencianan y nan propio debenan. Pero tambe den e contract por fiha afspraaknan manera con lo bai comparti gastonan ora cu ta bibando cu otro.
Tienda di Ley kier enfatisa cu a trata mas tanto posibel na splica e terminologianan aki den Papiamento pero no tur biaha tin palabranan huridico exacto cu por wordo uza. Ta spera cu por a informa e lector un poco tocante e topico aki. Si bo persona tin pregunta of ta desea asistencia huridico por tuma contacto cu nos via nos facebook page of nos e-mail: plataformahobennanprofesional@gmail.com.
Scirbi pa studiantenan di ley:
Gerick Croes LL.B. , BEc
Minorca Martis LL.B.
