Minister demisionario di Enseñansa Rudy Lampe, ta haya cu Integridad mester hunga un rol importante den gobernacion. E ta un punto cu e partido cu e ta representa, RED, ta para firm’e p’e.
P’esey tambe el a cuestiona declaracion haci door di e politico, candidato y exminister di AVP Benny Sevinger, kende ta deteni pa caso di corupcion. E mandatario a splica cu atentamente el a scucha declaracion di e politico deteni y no por sali di su asombra. El a cuestiona con el a ataca e organo di Ministerio Publico. “Un atake baho y contra integridad.” Loke el a cuestiona ta cu Sevinger niun momento ta bisa cu e ta inocente, pero ta simplemente cuestiona di con OM no ta persigui otronan cu a haci actua di e mesun forma. Pa colmo, ta e mesun situacion cu a surgi tambe tempo di Paul Croes den caso IBiS. “P’esey RED no solamente a demostra su derecho di existencia, pero derecho pa sigui ta den gobierno.”
Papiando di integridad, e mandatario a desbarata tur e acusacionnan falso cu tabata y tin contra di lider di e partido blanco Ricardo Croes.
El a nenga categoricamente cu Ricardo Croes a vota contra Ley di Screening di Ministernan pasobra e tin miedo. Tabatin motibo hustifica y Croes a cuestiona forma y contenido con e ley a bay Parlamento. Ta papia di un drugtest cu e mandatarionan mester haci y esaki no por tuma luga sin mas, pasobra mester tene cuenta cu algun aspecto. Por ehempel , Lampe a bisa cu tin hopi hende ta uza cannabis medicinal. P’esey RED a bini cu un amienda pa coregi esaki. “No por culpa Ricardo cu e proceso di ley di screening di minister no a sigui. Edgard Vrolijk tampoco a bay di acuerdo cu e articulo pa drecha e ley di screening.”
El a splica cu e intencion di Ricardo Croes cu e ambienda ta pa bini cu mehoracion di e ley pa tin miho ministernan na Aruba, y cu Integridad. “Nos a demostra nos derecho di existencia y a demostra cu nos ta contra corupcion. Nos ta spera cu pueblo votado realisa esaki.”
Na final e mandatario a presente tres candidato nobo Lorraine Cooijman, kende ta representa e vision di Agricultura. E otro candidatonan tabata Jair Tromp, un persona masha conoci riba tereno deportivo,y Frank Mejia, kende ta un persona cu perseverancia a logra te unda e ta awendia, cu su propio negoshi.
