Minister Xiomara Maduro ta comparti e bon noticia cu expertonan di Caribbean Regional Technical Assistance Centre (CARTAC), e asesor di IMF pa Caribe, a valida e modelo macroeconomico MARUBA cu Departamento Economico ta usa pa publica e perspectiva economico di Pais Aruba den e ‘Aruba Economic Outlook.’ Cu esaki ta keda comproba cu e modelo economico cu ta wordo usa pa haci proyeccion macroeconomico pa Aruba ta confiabel.
CARTAC ta impresiona cu e nivel di MARUBA
CARTAC a indica cu nan a keda impresiona cu e nivel di detaye y metodologia usa den e modelo economico MARUBA, sigur ora ta trata informacion riba tur locual economia ta ofrece. Awor Departamento Economico ta dispone di un modelo economico actualisa cu por proyecta e efecto macroeconomico di e decisionnan di Gobierno.
Lo amplia MARUBA cu informacion fiscal
Te cu awor no ta posibel pa haci proyeccion riba e efectonan di cambio fiscal riba economia di Aruba. Pesey riba recomendacion y cu asistencia di CARTAC, MARUBA lo wordo amplia cu un seccion pa pronostica cambionan fiscal y nan efecto riba economia di Aruba.
CARTAC a valida e Cuentanan Nacional tambe
E modelo economico MARUBA ta haci uso di informacion compila den e Cuentanan Nacional di Pais Aruba pa haci proyeccionnan. Ta bon pa sa cu aña pasa CARTAC a duna validez tambe na e cifranan y metodologia di nos Cuentanan Nacional. Di e manera aki por sigura cu no solamente MARUBA, sino tambe e informacion cu ta wordo usa den e modelo economico aki, tur dos ta confiabel.